ఎప్పుడో పూర్తై బయటకు రాకుండా ఉండిపోయిన చాలా బాలీవుడ్‌ సినిమాలు ఇప్పుడిప్పుడు బయటకు వస్తున్నాయి. ఇన్నాళ్లూ ఎందుకు రిలీజ్‌ అవ్వలేదో తెలియదు కానీ.. ఇప్పుడు మాత్రం భారీ ప్రచారంతో ఊదరగొడుతున్నాయి. అందులో ఓ సినిమా ఇప్పుడు మరో వారంలో విడుదలకు సిద్ధంగా ఉంది. అదే ‘బ్లైండ్’. ఈ సినిమా ట్రైలర్‌ను ఇటీవల విడుదల చేశారు. కాన్సెప్ట్‌, కమామిషు చూస్తే.. బాగుంది అనిపించేలా ఉంది. అయితే సినిమా థియేటర్లలో ఎందుకు రాలేదు అనేది తెలియదు.
ఇక సినిమా సంగతికొస్తే… జియా అనే అంధురాలైన పోలీసు కథ ఇది. అంధత్వం కారణంగా అధిగమించలేని సవాళ్లుని కూడా ఎదుర్కొని విజయం సాధించవచ్చనే సందేశాన్ని ఈ సినిమాలో చూపిస్తామని టీమ్‌ చెబుతోంది. స్కాట్‌లాండ్‌లో తప్పిపోయిన చాలా మంది మహిళలకు సంబంధించిన కేసుకు న్యాయం చేస్తాను అంటూ సోనమ్‌ కపూర్‌ (Sonam Kapoor) ఈ ట్రైలర్‌లో చెప్పిన డైలాగులు ఆకట్టుకుంటున్నాయి. జియో సినిమా ఓటీటీలో జులై 7న ఈ సినిమాను విడుదల చేస్తున్నారు.
షోమ్‌ మఖీజా దర్శకత్వంలో రూపొందిన ఈ సినిమా జియో స్టూడియోస్‌తో పాటు మరో మూడు నిర్మాణ సంస్థలు నిర్మిస్తున్నాయి. సోనమ్‌ పెళ్లి అయిన తర్వాత నాలుగేళ్ల క్రితం ‘ది జోయా ఫ్యాక్టర్‌’లో ఆఖరిగా ప్రేక్షకులకు కనిపించింది. మళ్లీ ఇప్పుడు ‘బ్లైండ్’తో అభిమానులను అలరించబోతోంది. ఇక ఈ సినిమా బ్యాగ్రౌండ్‌ సంగతికొస్తే.. 2011లో వచ్చిన ‘బ్లైండ్’ అనే కొరియన్‌ సినిమాను స్ఫూర్తిగా తీసుకొని తెరకెక్కించారట. ఈ సినిమాను పూర్తిగా గ్లాస్గో, స్కాట్‌లాండ్‌లోనే తెరకెక్కించారు.
‘బ్లైండ్’ సినిమా డిసెంబరు 28, 2020లో ప్రారంభబైంది. సుమారు 50 రోజుల్లోనే సినిమా చిత్రీకరణను పూర్తి చేశారు. అయితే ఇప్పుడు రెండేళ్ల తర్వాత జియో సినిమాస్‌ ఓటీటీలో రిలీజ్‌ చేస్తున్నారు. మరి సోనమ్‌కి రీఎంట్రీ కాని ఈ రీఎంట్రీ ఎలాంటి ఫలితాన్ని ఇస్తుందో చూడాలి. గతంలో సోనమ్‌ నటనకు ప్రాధాన్యమున్న పాత్రలు చేసినప్పుడు మంచి స్పందనే వచ్చింది. అలాగే అందాల ప్రదర్శనలో కూడా ఆమెకు మంచి మార్కులే పడ్డాయి. మరి ఈ సినిమా ఏం చేస్తుందో చూడాలి.
అశ్విన్స్ సినిమా రివ్యూ & రేటింగ్!
ఆ హీరోయిన్లలా ఫిట్ నెస్ కంటిన్యూ చేయాలంటే కష్టమే?
తన 16 ఏళ్ళ కెరీర్లో కాజల్ రిజెక్ట్ చేసిన సినిమాల లిస్ట్..!
