రాజమౌళి తండ్రి విజయేంద్ర ప్రసాద్ ఇటీవల ఓ ఫ్యాన్ మీట్లో పాల్గొన్నారు. ఇందులో భాగంగా ఆయన గత సినిమాల గురించి అలాగే రాబోయే ‘వారణాసి’ సినిమా గురించి కొన్ని ఆసక్తికర విషయాలు పంచుకున్నారు. ‘వారణాసి’ కి సంబంధించిన టాపిక్ సోషల్ మీడియాలో తెగ వైరల్ అవుతుంది. అయితే దాంతో పాటు గతంలో ఆయన పనిచేసిన సూపర్ హిట్ సినిమాల గురించి కూడా ఆసక్తికర విషయాలు పంచుకున్నారు. ఈ క్రమంలో బాలకృష్ణ సూపర్ హిట్ సినిమాల్లో ఒకటైన ‘బొబ్బిలి సింహం'(Bobbili Simham) గురించి ఇంట్రెస్టింగ్ విషయాలు రివీల్ చేశారు.
విజయేంద్ర ప్రసాద్ ‘బొబ్బిలి సింహం’ కథని మొదట నటుడు సుమన్ హీరోగా, భానుప్రియ, రేవతి హీరోయిన్లుగా నిర్మలమ్మ కీలక పాత్రలో ఊహించుకుని రాశారట. విజయేంద్రప్రసాద్ మాట్లాడుతూ.. “హీరో భార్య క్యాన్సర్ వ్యాధి బారిన పడిందని తెలుసుకుని.. ఆమె చనిపోయే ముందు… తన భర్త ఒంటరివాడు కాకూడదని, అతను ఇంకో పెళ్లి చేసుకుని వంశాన్ని ముందుకు నడిపించాలని నిర్ణయించుకుంటుంది. ఇందులో భాగంగా అతనిపై పగ సాధిస్తున్నట్టు ప్రవర్తిస్తూ మరోవైపు తనలో తానే కుమిలిపోతూ ఉంటుంది.
ఇది ఒక సున్నితమైన కథ. మొదట ఇందులో బొబ్బిలి లేదు సింహం లేదు(నవ్వుతూ). సుమన్ కి అయితే కరెక్ట్ గా సరిపోతుంది. ఎందుకంటే అతనికి ఫ్యామిలీ ఇమేజ్ ఉంది. ఇద్దరి పెళ్ళాల మధ్య నలిగే భర్త పాత్రలు అతనికి అలవాటే.! ఇంకో విషయం ఏంటంటే ఇది దాసరి గారి ‘ప్రేమాభిషేకం’ కథలానే ఉంటుంది. అయితే త్రివిక్రమ్ రావు గారికి నేను ఈ కథ చెప్పాను. ఆయన ఇది ‘బాగుందండీ.. దర్శకుడు ఎ. కోదండరామిరెడ్డి దగ్గర బాలకృష్ణ గారి డేట్లు ఉన్నాయి. ‘బొబ్బిలి సింహం’ టైటిల్ ఉంది. ఆయనతో చేద్దాం ‘మీరు మార్చి రాయండి’ అన్నారు.
కానీ సుమన్ గారి ఇమేజ్ వేరు. బాలకృష్ణ గారికి మాస్ ఇమేజ్ ఉంది. దీంతో శరత్ బాబు గారి క్యారెక్టర్ ని పెట్టి..వరదల్లో కొట్టుకుపోతున్నట్టు.. అక్కడ ఉండే ఇద్దరు పిల్లలలో తన సొంత బిడ్డను కాకుండా, హీరోను కాపాడి గొప్ప త్యాగం చేసినట్టు క్రియేట్ చేశాం. అలా ఎమోషన్ ని వర్కౌట్ చేస్తూ బాలయ్య ఇమేజ్ కి తగ్గట్టు ‘బొబ్బిలి సింహం’ స్క్రిప్ట్ ను డెవలప్ చేశాం.’సినిమా విజయానికి ఎమోషనే అత్యంత ముఖ్యం’ అని ఆ సినిమాతో తెలిసొచ్చింది. అదే ఫార్ములాను ఇప్పటికీ కొనసాగిస్తున్నాము.” అంటూ చెప్పుకొచ్చారు. ఆయన కామెంట్స్ కి సంబంధించిన వీడియో ఇప్పుడు వైరల్ గా మారింది.
