సినిమాని ఎంత పక్కాగా షెడ్యూల్ చేసినా.. కొన్నిసార్లు అనుకున్న సమయానికి పూర్తి కాదు. ఎక్కడో చిన్న లోపం కనిపించినా.. చిత్ర యూనిట్ మొత్తం సెట్స్ కి రావలసిందే. ప్రస్తుతం రంగస్థలం చిత్రబృందం పరిస్థితి ఇదే. హైదరాబాద్ లో వేసిన గ్రామీణ సెట్ లో సమంత ఉండే అన్ని సీన్లు కంప్లీట్ చేసింది. అయినా అందులో సహజత్వం మిస్ కావడంతో రీషూట్ చేస్తున్నారు. కొన్ని రోజులుగా సుకుమార్ టీమ్ రాజమండ్రి ప్రాంతంలోని ఓ గ్రామంలో షూటింగ్ చేస్తున్నారు. బోయపాటి సినిమా షూటింగ్ ని పోస్ట్ పోన్ చేసి ఈ షూట్ ని కంప్లీట్ చేయడానికి చరణ్ కష్టపడుతున్నారు. ఇక సమంత అయితే తన చేయి ఇబ్బంది పెడుతున్నా.. వైద్యులు విశ్రాంతి తీసుకోవాలని సూచించినా వినకుండా షూటింగ్ కి హాజరైంది. చేతి కట్టుతోనే సీన్ ని కంప్లీట్ చేసే పనిలో పడింది.
ఈ సంగతిని ఆమె సోషల్ మీడియాలో వెల్లడించింది. “చాలా హార్డ్‌వ‌ర్క్ చేస్తున్నాం. దానికి నా చెయ్యే నిద‌ర్శ‌నం” అని సమంత ఇన్‌స్టాగ్రామ్ లో పోస్ట్ చేసింది. మైత్రిమూవీ మేకర్స్ వారు నిర్మిస్తున్న ఈ సినిమా టీజర్ రీసెంట్ గా రిలీజ్ అయి విశేషంగా ఆకట్టుకుంది. సౌండ్ ఇంజినీర్ చిట్టిబాబుగా రామ్ చరణ్ పలికిన హావభావాలు ప్రశంసలు అందుకుంటున్నాయి. ఇందులో సమంత మూగదానిగా నటిస్తున్నట్టు సమాచారం. ఆమె టీజర్ కోసం పఅభిమానులు ఎదురుచూస్తున్నారు. ఆది, జగపతిబాబు కీలకపాత్రలు పోషిస్తోన్న ఈ చిత్రం మార్చి 30 న రిలీజ్ కానుంది.
