మొన్నామధ్య ‘దేవర 2’ (Devara 2) గురించి రకరకాల పుకార్లు వినిపించాయి. సినిమా పనులు ఆపేశారని, దర్శకుడు కొరటాల శివ వేరే హీరోను వెతికే పనిలో ఉన్నారని, కొత్త ప్రాజెక్ట్‌ పనులు స్టార్ట్‌ చేస్తారు అంటూ పెద్ద ఎత్తున వార్తలు వండి వార్చేశారు. మీరు కూడా చదివే ఉంటారు. అయితే ‘మ్యాడ్‌ స్క్వేర్‌’ సినిమా సక్సెస్‌ మీట్‌లో ‘దేవర 2’ సినిమా కచ్చితంగా ఉంటుంది అని చెప్పేశాడు తారక్‌.
అయితే ఇప్పుడు పరిస్థితి చూస్తుంటే మళ్లీ డౌట్స్‌ వస్తున్నాయి. ఈసారి మళ్లీ తారక్‌ నుండి క్లారిటీ వస్తుందేమో చూడాలి. ‘ఆర్‌ఆర్‌ఆర్‌’ సినిమా తర్వాత ఎన్టీఆర్ కొన్ని రోజులు గ్యాప్‌ తీసుకున్నాడు. ఆ తర్వాత ‘దేవర’ సినిమా చేశాడు. ఆ సినిమా షూటింగ్ దశలో ఉండగానే రెండు ముక్కలు చేసేశారు. ఆ తర్వాతి ప్రాజెక్‌లు ఏవీ ఆయన ఓకే చేయకపోవడంతో ‘దేవర’ రిలీజ్ అయిన వెంటనే ‘దేవర 2’ స్టార్ట్‌ చేస్తారేమో అనుకున్నారంతా.
అప్పట్లో మాటలు కూడా అలానే ఉన్నాయి. కానీ ఆయన చూస్తే ‘వార్‌ 2’ సినిమా పనులు శరవేగంగా పూర్తి చేసే పనిలో ఉన్నారు. ఈ లోపు ప్రశాంత్‌ నీల్‌ ‘డ్రాగన్‌’ ( రూమర్డ్‌ టైటిల్‌) మధ్యలోకి వచ్చింది. అయినా ‘దేవర 2’ చేస్తా అని చెప్పాడు తారక్‌. కానీ ఇప్పుడు చూస్తే ఎన్టీఆర్ వరుస సినిమాల్ని లైనప్‌లో పెట్టేస్తున్నారు. ప్రశాంత్‌ నీల్‌ తర్వాత త్రివిక్రమ్‌ సినిమా స్టార్ట్‌ అవుతుంది అని నిర్మాత నాగవంశీ తెలిపారు. ఇది కాకుండా నెల్సన్‌ దిలీప్‌ కుమార్‌ సినిమా ఉంటుందని సమాచారం.
రాబోయే నాలుగేళ్లలో ఈ సినిమాలు వస్తాయి అని తెలుస్తోంది. ఈ లెక్కన ‘దేవర 2’ సినిమాకు ఇప్పట్లో ప్రారంభించుకునే అవకాశమే లేదు. ఏ 2027 ఆఖరులో మొదలైతే సినిమా రావడానికి 2028 ఆఖరు అవుతుంది. కాబట్టి ‘దేవర 2’ ఉండకపోవాలి? లేదంటే చాలా ఏళ్లు గ్యాప్‌ రావాలి. అన్నేళ్లు గ్యాప్‌ అంటే పెద్ద విషయమే.
