మెగాస్టార్ చిరంజీవి (Chiranjeevi) సినిమా వస్తుందంటే.. తెలుగు రాష్ట్రాల్లో పండగ వాతావరణం ఏర్పడేది. టికెట్ల కోసం అభిమానులు ముందు రోజు అర్ధరాత్రి నుండి థియేటర్ల వద్ద పడిగాపులు కాసేవారు. టాక్ తో సంబంధం లేకుండా చిరు సినిమాలు భారీ వసూళ్లు సాధించిన సందర్భాలు అనేకం. చిరు సినిమా వస్తుంది అంటే.. పోటీగా మరో హీరో సినిమాని రిలీజ్ చేయడానికి దర్శకనిర్మాతలు భయపడే రోజులవి.
మరోపక్క చేసిన సినిమాలు అన్నీ ప్లాపులవ్వడంతో.. అప్పులపాలయ్యాడు మోహన్ బాబు(Mohan Babu). నిర్మాణ సంస్థ మూసుకునే పరిస్థితి ఏర్పడింది. అలాంటి టైంలో తన స్నేహితుడు రజినీకాంత్ (Rajinikanth) సూచన మేరకు ‘నట్టమై’ (Nattamai) అనే తమిళ సినిమా రీమేక్ రైట్స్ ను దక్కించుకున్నారు మోహన్ బాబు (Mohan Babu) . తెలుగులో దానిని ‘పెదరాయుడు’ (Peddarayudu) గా తీశారు. రవిరాజా పినిశెట్టి చాలా మార్పులు చేసి డైరెక్ట్ చేసిన సినిమా ఇది. ఈ సినిమా కనుక ప్లాప్ అయితే ప్రొడక్షన్ హౌస్ ఎత్తేసే పరిస్థితి మోహన్ బాబుది.
ఇలాంటి పరిస్థితుల్లో చిరంజీవి (Chiranjeevi) వంటి స్టార్ హీరో సినిమాకి పోటీగా దింపడం అంటే మామూలు రిస్క్ కాదు కదా..! అయినా సరే దేవుడిపై భారం వేసి ఆ సాహసం చేశారు మోహన్ బాబు (Mohan Babu) . 1995 జూన్ 15 న ఈ చిత్రాన్ని విడుదల చేశారు. అదే రోజున చిరంజీవి (Chiranjeevi ‘బిగ్ బాస్’ (Big Boss) రిలీజ్ అయ్యింది. మార్నింగ్ షోలు అన్నీ ‘బిగ్ బాస్’ హౌస్ ఫుల్స్ తో ప్యాక్ చేశాడు. కానీ కట్ చేస్తే.. సినిమాకి ప్లాప్ టాక్ వచ్చింది. మరోపక్క ‘పెదరాయుడు’ మార్నింగ్ షోలు 20 శాతం ఆక్యుపెన్సీలు కూడా లేవు.
అయితే దానికి హిట్ టాక్ రావడంతో మ్యాట్నీల నుండి ‘పెదరాయుడు’ సినిమాకి ఆక్యుపెన్సీలు పెరిగాయి. 2వ రోజు,3వ రోజుకు స్క్రీన్స్ కూడా పెరిగాయి.ఆ తర్వాత మౌత్ టాక్ తో ‘పెదరాయుడు’ ఓపెనింగ్స్ ను పెంచుకుంటూ పోయింది. బాక్సాఫీస్ వద్ద భారీ వసూళ్లు సాధించడమే కాకుండా సిల్వర్ జూబ్లీ సెలబ్రేషన్స్ కూడా జరుపుకుంది.
