భర్తతో సిగిరెట్‌, మద్యం మాన్పించడానికి భార్యలు చాలా కష్టపడుతుంటారు. మీ ఇళ్లలోనో, బంధువుల దగ్గరో ఈ విషయం చూసే ఉంటారు. లేదంటే వినే ఉంటారు. అయితే బోనీ కపూర్‌తో సిగరెట్‌ మాన్పించడానికి శ్రీదేవి ఏం చేసిందో తెలుసా? ఈ విషయాన్ని ఆమె పెద్ద కూతురు జాన్వీ కపూర్‌ ఇటీవల చెప్పుకొచ్చింది. తన సినిమా ‘మిలీ’ ప్రచారంలో భాగంగా జాన్వీ.. తన తల్లిదండ్రుల గురించి కొన్ని ఆసక్తికర విషయాలు చెప్పుకొచ్చింది.
బాలీవుడ్‌ నిర్మాత, బోనీ కపూర్‌కు సిగరెట్లు తాగే అలవాటు ఉండేదట. ఆ అలవాటును మాన్పించడానికి శ్రీదేవి ఎంతో శ్రమించిందట. అయితే చాలా రోజులు ప్రయత్నించినా.. బోనీ సిగరెట్లు మానలేదట. దీని కోసం జాన్వీ కపూర్‌, ఖుషీ కపూర్‌ కూడా చాలా రకాలు ప్రయత్నించారట. బోనీ కపూర్‌కి తెలియకుండా రోజూ సిగరెట్లను ముక్కలు ముక్కలుగా చేసేసేవాళ్లట. ఒక్కొసారి సిగరెట్‌ ప్యాకెట్‌లో టూత్‌ పేస్ట్‌ పెట్టేసేవాళ్లట. ఇలా ఎన్ని ప్రయత్నాలు చేసినా బోనీ కపూర్‌ సిగరెట్లు మానలేదట.
దీంతో ఇక ఇలా కుదరదు అని శ్రీదేవి గ్రహించి… శాకాహారిగా మారిపోయిందట. మీరు సిగరెట్లు మానకపోతే మాంసాహారాన్ని తినను అని బోనీ కపూర్‌తో తేల్చి చెప్పేసిందట శ్రీదేవి. అయితే శ్రీదేవి ఆరోగ్యం క్షీణిస్తోందని, కచ్చితంగా మాంసాహారాన్ని తీసుకోవాల్సిందేనని వైద్యులు సూచించారట. దీనికి శ్రీదేవి అంగీకరించలేదట. బోనీ బతిమలాడినా వినలేదట. అలా, కొంతకాలానికి శ్రీదేవి ఆరోగ్యం కోసం బోనీ కపూర్‌ ధూమపానం మానేశారట. ఇదంతా ‘వాంటెడ్‌’, ‘నో ఎంట్రీ’ సినిమాల షూటింగ్‌ సమయంలో జరిగిందట.
శ్రీదేవి అకాల మరణం తర్వాత ఇప్పుడు జాన్వీ, ఖుషీకి బోనీ కపూర్‌ అన్నీ అయ్యి పెంచుతున్నారు. జాన్వీ సినిమా కెరీర్‌ను ట్రాక్‌లోకి తీసుకొచ్చే పనులు చూస్తూనే.. ఖుషీ హీరోయిన్ ఎంట్రీ కోసం ప్లాన్స్‌ వేస్తున్నారు బోనీ కపూర్‌. మరోవైపు నిర్మాతగా ఆయన తమిళం, తెలుగులో వరుస సినిమాలు చేస్తున్నారు. తమిళంలో అజిత్‌ హీరోగా సినిమాలు వస్తున్నాయి. తెలుగులో ‘వకీల్‌సాబ్‌’ తర్వాత ఇంకేం రాలేదు.
Most Recommended Video
ఓరి దేవుడా సినిమా రివ్యూ & రేటింగ్!
ప్రిన్స్ సినిమా రివ్యూ & రేటింగ్!
అత్యధిక కేంద్రాల్లో సిల్వర్ జూబ్లీ ప్రదర్శించబడిన సినిమాల లిస్ట్ ..!
