అర్జున్ రెడ్డి.. రంగస్థలం.. భరత్ అనే నేను..ఇవ్వన్నీ తెలుగులో తాజాగా విజయవంతమైన చిత్రాలు. వీటికి కామన్ పాయింట్ ఏమిటంటే నిడివి మూడు గంటలు ఉండడం. సాధారణంగా రెండున్నర గంటలు థియేటర్లో ప్రేక్షకులను కూర్చోబెట్టడమే కష్టమైన ఈ పరిస్థితుల్లో మూడు గంటల సినిమా తీసి మెప్పించారు. అయితే కళ్యాణ్ రామ్ ఇందుకు భిన్నంగా వెళ్తున్నారు. కేవలం రెండు గంటల్లోనే సినిమాని ముగించేలా ప్లాన్ చేశారు.
పటాస్ తర్వాత కళ్యాణ్ రామ్ కి మంచి హిట్ లేదు. రీసెంట్ గా వచ్చిన ఎమ్మెల్యే కూడా ఆశించినతస్థాయి విజయం సాధించలేదు. తాజాగా అతను జయేంద్ర దర్శకత్వంలో నా నువ్వే అనే మూవీ చేశారు. ఇతను ఆరేళ్లక్రితం సిద్ధార్థతో 180 అనే చిత్రం చేశారు. మళ్ళీ ఇన్నియేళ్ళకు ఈ చిత్రాన్ని తెరకెక్కించారు. ఇందుకు ప్రముఖ సినిమాటోగ్రాఫర్ పీసీ శ్రీరామ్ కెమెరా మెన్ గా వ్యవహరించడం విశేషం. మిల్కీ బ్యూటీ తమన్నా హీరోయిన్ గా చేసిన ఈ మూవీ ఈనెల 25 న ప్రేక్షకుల ముందుకు రాబోతోంది. త్వరలో సెన్సార్ ముందుకు వెళ్లనుంది. ఫైనల్ కట్ అయిన తర్వాత ఈ సినిమా నిడివి 118 నిముషాలు వచ్చిందని సమాచారం. కథని చాలా స్పీడ్ గా చెప్పాలనే ఉద్దేశంతోనే ఈ నిర్ణయం తీసుకున్నట్టు తెలిసింది. మలయాళ సంగీత దర్శకుడు శరత్ సంగీతమందించిన ఈ మూవీ నేటి యువతను ఆకట్టుకుందని చిత్ర బృందం నమ్మకంతో ఉంది.
