వారానికో సెట్‌లో ఉంటూ.. మధ్యలో రాజకీయాల్లోకి వెళ్తూ బిజీగా ఉంటున్నాడు పవన్ కల్యాణ్‌. అయితే ఓ సినిమా విషయాన్ని మాత్రం పట్టించుకోవడం లేదు. అదే ‘హరి హర వీరమల్లు’. ఈ సినిమా చాలా నెలల క్రితమే మొదలైంది. ఆ తర్వాత ఏమైందో ఏమో కానీ సినిమాను బ్రేక్‌లేసి వేరే సినిమాలు మొదలుపెట్టేశాడు పవన్. ఆ సినిమాలు రిలీజ్‌ అయిపోయాయి కూడా. ఈ లోపు కొత్త సినిమాలు కూడా స్టార్ట్‌ చేసి డేట్స్‌ ఇచ్చి షూటింగ్‌ కూడా పూర్తి చేస్తున్నాడు. ఇక ‘వీరమల్లు’ ఉండదు అనుకున్నప్పుడల్లా.. ఇదిగో డేట్స్‌ ఇచ్చాడు అంటున్నారు. కానీ షూటింగ్‌ అవ్వడం లేదు.
తాజాగా మేలో సినిమా షూటింగ్‌ ఉంటుందని ఆ మధ్య వార్తలొచ్చాయి. ఈ మేరకు రామోజీ ఫిలిం సిటీలో ఓ సెట్‌ కూడా వేశారు అని చెప్పారు. మే రెండో వారంలో షూటింగ్‌ ఉండొచ్చు అని అన్నారు కూడా. చూస్తే మూడో వారం అయిపోవస్తోంది. దీంతో నాలుగో వారంలో అయినా డేట్స్‌ ఇస్తాడేమో అనుకున్నారంతా. కానీ ఇప్పుడు జూన్‌ నెలకు సినిమా డేట్స్‌ షిఫ్ట్‌ అయిపోయాయి అని అంటున్నారు. అన్నీ అనుకున్నట్లు జరిగితే వచ్చే నెల తొలి వారంలో షూటింగ్‌ ఉండొచ్చు అంటున్నారు.
దీంతో మరోసారి (Hari Hara Veera Mallu) ‘వీరమల్లు’ టీమ్‌కి పవన్ షాక్‌ అంటూ సోషల్‌ మీడియాలో కౌంటర్లు పడుతున్నాయి. మరి వాటికి టీమ్‌ ఏమైనా స్పందిస్తుందేమో చూడాలి. ఇప్పటివరకు అయితే అలాంటి స్పందనేమీ లేదు. ఇక వార్తల ప్రకారం చూస్తే… జూన్‌లో జరగబోయే షెడ్యూల్‌లో పవన్ కళ్యాణ్‌పై యాక్షన్ ఎపిసోడ్ షూట్ చేయనున్నారని సమాచారం. మొఘల్ కాలం నాటి ఫిక్షన్ కథతో ఈ సినిమా తెరకెక్కుతోందనే విషయం తెలిసిందే.
ఇక ఈ సినిమాలో హీరోయిన్‌గా నిధి అగర్వాల్ నటిస్తోంది. జాక్వెలిన్ ఫెర్నాండెజ్ ఓ కీలక పాత్రలో కనిపించనుంది. ‘హరి హర వీరమల్లు’ సినిమాను పాన్ ఇండియా సినిమాగా విడుదల చేయనున్నారు. మెగా సూర్య ప్రొడక్షన్స్ బ్యానర్ పై ఎ.ఎం. రత్నం ఈ సినిమాను నిర్మిఇస్తున్నారు. ఈ సినిమా నుండి ఇప్పటివరకు వచ్చిన లుక్స్‌, టీజర్స్‌కు మంచి స్పందనే వచ్చింది.
బిచ్చగాడు 2 సినిమా రివ్యూ & రేటింగ్!
డెడ్ పిక్సల్స్ వెబ్ రివ్యూ & రేటింగ్!
అన్నీ మంచి శకునములే సినిమా రివ్యూ & రేటింగ్!
పిల్లలను కనడానికి వయస్సు అడ్డుకాదంటున్న సినీతారలు
