‘బుజ్జి’, ‘బుజ్జి’, ‘బుజ్జి’.. గత కొన్ని రోజులుగా తెలుగు సినిమా ఫ్యాన్స్‌ అంతా దీని గురించే మాట్లాడుతున్నారు. తొలి రోజు అంతా ప్రభాస్‌ (Prabhas) జీవితంలో అంత ముఖ్యమైన ఆ ‘బుజ్జి’ ఎవరు అని చర్చించగా.. ఆ తర్వాత అది ‘కల్కి 2898 ఏడీ’ (Kalki 2898 AD) సినిమా గురించి తెలిసి.. హీరోయిన్ల గురించేమో, విలన్ గురించేమో అంటూ రకరకాల ఊహాగానాలు వినిపించాయి. అయితే అందరికీ షాక్‌ ఇస్తూ.. ‘బుజ్జి’ అంటే మనిషి కాదు అని, ఓ స్పెషల్‌ కారు అని టీమ్‌ అనౌన్స్‌ చేసేసింది.
బుజ్జి గురించి చెప్పే క్రమంలో టీమ్‌ ఓ స్పెషల్‌ వీడియో చేసింది. ‘బుజ్జి’ అనే కారు మెదడు సినిమా టీమ్‌తో, ప్రేక్షకులతో మాట్లాడుతున్నట్లు ఓ వీడియో రూపొందించారు. మొత్తంగా ఆ వీడియోలో ఆ బుజ్జి మెదడే హైలైట్‌ అయింది. అంతలా ఆ వీడియోను ఆసక్తికరంగా సిద్ధం చేశారు. అయితే ఇప్పుడు ఈ సినిమా వీడియోను.. మహేష్‌బాబు డిజాస్టర్‌ సినిమా ‘స్పైడర్‌’ (Spyder) వీడియోను ఫ్యాన్స్‌, నెటిజన్లు కంపేర్‌ చేసి చూస్తున్నారు.
మహేష్‌బాబు (Mahesh Babu) – మురుగదాస్‌ (A.R. Murugadoss) కాంబినేషన్‌లో రూపొందిన చిత్రం ‘స్పైడర్‌’. ఎన్నో అంచనాలతో వచ్చిన ఆ సినిమా బాక్సాఫీసు దగ్గర బొక్కబోర్లా పడింది. అయితే ఆ సినిమా టీజర్‌ వీడియోలో ఓ సాలీడును చూపించారు. సినిమా స్పైడర్‌.. వీడియోలో స్పై లుక్‌ చూసి సినిమా అదిరిపోతుందని ప్లాన్‌ వేసుకుని థియేటర్లకు వచ్చారు జనాలు. కానీ థియేటర్లలోకి వెళ్లి చూస్తే ఎక్కడా ఆ ‘స్పై’డర్‌ కనిపించలేదు. కేవలం ‘డర్‌’ మాత్రం కనిపించింది.
దీంతో ఇప్పుడు ‘కల్కి’ సినిమాలో బుజ్జి కేవలం ప్రచారం కోసం మాత్రమే ఉంటుందా? లేక సినిమాలో కూడా ఉంటుందా అనే చర్చ జరుగుతోంది. ఎందుకంటే సీరియస్‌ సినిమాలో ‘బుజ్జి’ కామెడీగా కనిపించే ప్రమాదం ఉంది. అయితే ఆ పాత్ర సినిమాలో కీలకం అని, దాంతోనే ఫన్‌ జనరేట్‌ చేసి కాస్త రిలీఫ్‌ ఇస్తారనే టాక్‌ కూడా వస్తోంది. మరి ఇందులో ఏది నిజం ‘బుజ్జి’ సినిమాలో ఎలా ఉంటుంది అనేది టీమే చెప్పాలి.
