కన్నడ నుండి టాలీవుడ్‌కి వచ్చిన తెలుగు అందం శ్రీలీల (Sreeleela) ఇప్పుడు ముంబయి ఫ్లయిట్‌ ఎక్కుతోందా? బాలీవుడ్‌లో తన కెరీర్ స్టార్ట్‌ చేయబోతోందా? ఈ ప్రశ్నలకు బాలీవుడ్‌ వర్గాల నుండి అవును అనే సమాధానాలే వస్తున్నాయి. దానికి కారణం ఓ అగ్ర హీరో తనయుడి సినిమాలో ఆమెను కాస్ట్‌ చేసుకున్నారు అనే పుకార్లు రావడమే. అన్నీ అనుకున్నట్లుగా జరిగితే త్వరలోనే శ్రీలీల బాలీవుడ్‌ ఎంట్రీ వార్త అధికారికంగా ప్రకటిస్తారని టాక్‌. శ్రీలీల తెలుగు చిత్రసీమలో అడుగు పెట్టిన కొద్ది రోజుల్లోనే స్టార్ నాయికగా పేరు తెచ్చుకుంది.
అగ్రహీరోలతో ఒకవైపు, కుర్ర కథానాయకులతో మరోవైపు వరుసగా సినిమాలు ఓకే చేసింది. ఆ సినిమాలు పూర్తయిన తర్వాత కొత్తగా ఏ సినిమాలు ఓకే చేయలేదు. దానికి కారణం ఆమె చేసిన సినిమాలు సరైన విజయం అందుకోకపోవడమే. ప్రస్తుతం ఆమె చేతిలో ‘ఉస్తాద్‌ భగత్‌ సింగ్‌’ (Ustaad Bhagat Singh) మాత్రమే ఉంది. ఇది కాకుండా రవితేజ (Ravi Teja) సినిమా ఒకటి ఓకే చేసిందని టాక్‌. ఈ నేపథ్యంలో ఆమె బాలీవుడ్‌ ప్రయాణం వార్తలు ఆసక్తికరంగా మారింది.
ఎందుకంటే ఇక్కడే సరైన సినిమాలు లేవు. మరి అక్కడికెళ్లి ఎలా? అనేది ఒక ప్రశ్న అయితే, మరో ప్రశ్న రష్మిక మందన (Rashmika Mandanna)చుట్టూ నడుస్తోంది. ఆమె టాలీవుడ్‌లో మాంచి జోరు మీదున్న సమయంలోనే శ్రీలీల వచ్చింది. దీంతో కొన్ని ఛాన్స్‌లు ఇటువైపు వచ్చేశాయి అనే విమర్శలు ఉన్నాయి. ఈ నేపథ్యంలో ఇప్పుడు బాలీవుడ్‌లో రష్మిక వరుస సినిమాలు చేస్తోంది. మరి శ్రీలీల వెళ్తే ఏమన్నా అవకాశాలు తగ్గుతాయా అనేది చూడాలి.
ఇక శ్రీలీల సినిమా ఆఫర్‌ గురించి చూస్తే.. సైఫ్‌ అలీ ఖాన్‌ (Saif Ali Khan) తనయుడు ఇబ్రహీం అలీ ఖాన్‌ హీరోగా కునాల్‌ దేశ్‌ముఖ్‌ దర్శకత్వంలో ఓ సినిమా రూపొందుతోంది. ఈ సినిమా కోసమే శ్రీలీల పేరు పరిశీలనలో ఉన్నట్లు సమాచారం. ఇంటెన్స్‌ లవ్‌స్టోరీగా తెరకెక్కనున్న ఈ సినిమా షూటింగ్‌ ఆగస్టు నుండి ఉంటుంది అంటున్నారు.
