భారీ పోటీ అనేది లేకపోయినా ఒకేరోజు ఇద్దరు మెగాహీరోల సినిమాలు ఎక్కడ రిలీజావుతాయో అని తెగ కంగారుపడిపోయారు మెగా అభిమానులు. వరుణ్ తేజ్ “తొలిప్రేమ”, సాయిధరమ్ తేజ్ “ఇంటిలిజెంట్” చిత్రాలు ఫిబ్రవరి 9న విడుదలకు సన్నద్ధమవ్వడం, ఏ ఒక్క సినిమా కూడా వెనక్కి తగ్గే అవకాశం నిన్నటివరకూ కనిపించలేదు. అయితే.. “ఫిదా” సక్సెస్ అనంతరం ఫుల్ ఫామ్ లోకి వచ్చిన వరుణ్ తేజ్ “తొలిప్రేమ”, వరుస పరాజయాలతో ఎక్కడ తన ఉనికి కోల్పోతానో అనే భయంతో వినాయక్ దర్శకత్వంలో సాయిధరమ్ తేజ్ నటించిన “ఇంటిలిజెంట్” చిత్రాల్లో ఏ సినిమా హిట్ అవుతుంది, ఏది ఫ్లాపవుతుంది అనే విషయం పక్కనపెడితే రెండు సినిమాలు ఒకేరోజు విడుదలవ్వడం బిజినెస్ పరంగానూ మంచిది కాదు. అందరుకే మెగా హీరోలిద్దరూ కూర్చుని ఒక డెసిషన్ కి వచ్చారు.
ఇప్పుడున్న పరిస్థితుల్లో సినిమాని మరొవారం పోస్ట్ చేయడం అనేది వరుణ్ తేజ్, సాయిధరమ్ తేజ్ లలో ఎవరికీ మంచిది కాదు. ఆల్రెడీ ప్రోమోషన్స్ కూడా గట్టిగా మొదలెట్టారు కాబట్టి లేట్ అయితే బడ్జెట్ పెరిగే అవకాశాలు ఎక్కువగా ఉంటాయి. అందుకే వరుణ్ తేజ్ తన “తొలిప్రేమ”ను ఒకరోజు ఆలస్యంగా విడుదల చేసేందుకు అంగీకరించాడని తెలుస్తోంది. ఫిబ్రవరి 9న విడుదలవ్వాల్సిన “తొలిప్రేమ”ను ఫిబ్రవరి 10న విడుదల చేస్తున్నాడు. నిర్మాత భోగవల్లి ప్రసాద్ కూడా ఇందుకు సహకరించడంతో ఎలాంటి ఇబ్బంది లేకుండా ఈ మెగా రాజీ జరిగింది.
