మాటల మాంత్రికుడు త్రివిక్రమ్ శ్రీనివాస్, విక్టరీ వెంకటేశ్ కాంబినేషన్ అంటేనే తెలుగు ప్రేక్షకులకు ఒక తీపి జ్ఞాపకం. ‘నువ్వు నాకు నచ్చావ్’, ‘మల్లీశ్వరి’ లాంటి సినిమాలకు త్రివిక్రమ్ రాసిన మాటలు, వెంకీ పండించిన నటన ఇప్పటికీ ఎవర్ గ్రీన్. మళ్ళీ వీరిద్దరూ కలుస్తున్నారంటే ఆ అంచనాలు ఎలా ఉంటాయో ప్రత్యేకంగా చెప్పక్కర్లేదు. అయితే ఇప్పుడు ఈ సినిమాకు పెట్టినట్లు ప్రచారంలో ఉన్న ఒక టైటిల్ వింటేనే మనసులో ఏదో తెలియని ఆనందం, పండగ వాతావరణం కలుగుతోంది.
VENKATESH
సోషల్ మీడియాలో వినిపిస్తున్న బజ్ ప్రకారం, ఈ సినిమాకు ‘బంధుమిత్రుల అభినందనలతో’ అనే టైటిల్ ను పరిశీలిస్తున్నారట. ఈ పేరు వినగానే మనకు ఏదో పెళ్లి పత్రిక చదివిన ఫీలింగ్ కలుగుతోంది. త్రివిక్రమ్ మార్క్ స్వచ్ఛమైన తెలుగుతనం, ఆ సంప్రదాయం ఈ టైటిల్ లో స్పష్టంగా కనిపిస్తోంది. ఈ మధ్య కాలంలో గన్ సౌండ్లు, రక్తపాతాల మధ్య ఇలాంటి ఆహ్లాదకరమైన టైటిల్ వినడం ప్రేక్షకులకు నిజంగా ఒక పెద్ద రిలీఫ్ అని చెప్పాలి.
నిజానికి వెంకటేశ్ కు ఇలాంటి ఫ్యామిలీ టైటిల్స్ భలేగా సెట్ అవుతాయి. గతంలో వచ్చిన ‘ఆడవారి మాటలకు అర్థాలే వేరులే’, ‘సీతమ్మ వాకిట్లో సిరిమల్లె చెట్టు’ వంటి సినిమాలు టైటిల్ తోనే సగం పాజిటివ్ వైబ్స్ క్రియేట్ చేశాయి. ఇప్పుడు త్రివిక్రమ్ కూడా అదే మ్యాజిక్ రిపీట్ చేయబోతున్నారనిపిస్తోంది. ఈ టైటిల్ చూస్తుంటే ఇది పక్కా వింటేజ్ త్రివిక్రమ్ మార్క్ ఫ్యామిలీ ఎంటర్టైనర్ అని, నవ్వులు పూయించడం ఖాయమని అర్థమవుతోంది.
ఈ మధ్య కాలంలో వెంకటేశ్ ‘సైంధవ్’ వంటి సీరియస్ యాక్షన్ సినిమాలు చేసినా, ఫ్యాన్స్ మాత్రం ఆయన నుంచి ఆశించేది వినోదమే. అందుకు ఉదాహరణ ‘ సంక్రాంతికి వస్తున్నాం’ అనే సినిమా. అ సినిమా ఏ రేంజ్ లో హిట్ అయ్యిందో ప్రత్యేకంగా చెప్పనవసరం లేదు. ఇక కుటుంబం అంతా కలిసి కూర్చుని నవ్వుకునే సినిమా వచ్చి చాలా రోజులైంది. ఆ లోటును తీర్చడానికే ఈ ‘బంధుమిత్రుల అభినందనలతో’ వస్తున్నట్లుంది. టైటిల్ లోనే ఇంత పాజిటివిటీ ఉంటే, ఇక సినిమాలో వినోదం, ఎమోషన్ ఏ రేంజ్ లో ఉంటాయో ఊహించుకోవచ్చు. ప్రస్తుతం ఈ టైటిల్ వ్యవహారం ఫిలిం నగర్ లో హాట్ టాపిక్ గా మారింది. త్వరలోనే దీనిపై అధికారిక ప్రకటన వచ్చే అవకాశం ఉంది.
