18 ఏళ్ల కలను నెరవేర్చుకుంటూ రాయల్‌ ఛాలెంజర్స్‌ బెంగళూరు.. ఐపీఎల్‌ (IPL Win) విజేతగా నిలిచింది. దీంతో మంగళవారం రాత్రి నుండి ప్రపంచవ్యాప్తంగా ఉన్న ఆర్సీబీ ఫ్యాన్స్‌ సంబరాలు చేసుకుంటూనే ఉన్నారు. ఇందులో సినిమా పరిశ్రమకు చెందిన వాళ్లు కూడా ఉన్నారు. అయితే ఓ ఇద్దరికి సంబంధించిన వీడియోలు మాత్రం రాత్రి నుండి సోషల్‌ మీడియాలో తెగ వైరల్ అవుతున్నాయి. అందులో ఒకరు స్టార్‌ హీరో తనయుడు అయితే, మరొకరు స్టార్‌ దర్శకుడు.
సోషల్‌ మీడియాను బాగా ఫాలో అయ్యేవాళ్లయితే ఆ ఇద్దరూ అల్లు అయాన్‌, ప్రశాంత్‌ నీల్‌ (Prashanth Neel) అని చెప్పేస్తారు. మంగళవారం రాత్రి బెంగళూరు గెలవగానే రెండు వీడియోలు సోషల్‌ మీడియా ఫీడ్‌లో తెగ సందడి చేశాయి. తన అభిమాన జట్టు గెలవడంతో, తన అభిమాన క్రికెటర్‌కు ఫైనల్‌గా కప్‌ (IPL Win) గెలవడంతో అల్లు అయాన్‌ ఎమోషనల్‌ అయిపోయాడు. ఆ ఒత్తిడిని కంట్రోల్‌ చేసుకున్నాక నార్మల్‌ అవ్వడానికి తల మీద బాటిల్‌తో నీళ్లు పోసుకుని..
18 ఏళ్ల తర్వాత సాధించాం అంటూ ఆనందంగా సందడి చేయడం ఆ వీడియో చూడొచ్చు. ఈ వీడియోను తన విషెస్‌తో పాటుగా అల్లు అర్జున్‌ సోషల్‌ మీడియాలో షేర్‌ చేశాడు. ఇక పెద్ద స్క్రీన్‌ మీద మ్యాచ్‌ వేసి చూసిన ప్రశాంత్‌ నీల్‌ అండ్‌ టీమ్‌.. తమ జట్టు గెలవగానే సంబరాల్లో మునిగిపోయారు. ప్రశాంత్‌ నీల్‌ అయితే చిన్న పిల్లాడిలా తెర ముందు గంతులేస్తూ హడావుడి చేశాడు. ఈ వీడియోను లిఖిత తన సోషల్‌ మీడియాలో షేర్‌ చేశారు.
ఆ వీడియోను రీషేర్‌ చేస్తూ అభిమానులు మరింత ఆనందం వ్యక్తం చేస్తున్నారు. వీరితోపాటు ఇతర సినిమా తారలు, సెలబ్రిటీలు కూడా తమ విషెస్‌ను తెలియజేస్తున్నారు. ఇన్నేళ్ల నిరీక్షణకు తెరపడటం అంటే చిన్న విషయం కాదు. ఆ మాత్రం ఉంటుంది. ఫైనల్‌గా ఈ సాలా కప్‌ నమ్‌దు అని కర్ణాటక ఆనందానికి ఆకాశమే హద్దు అయింది.
