విడుదలకు ముందు లీకైనా సూపర్ హిట్ అయిన సినిమాలు

“అత్తారింటికి దారేది” సినిమా రిలీజ్ కి ముందు ఏకంగా 90 నిమిషాల సినిమా లీక్ అయ్యింది. ఏం చేయాలో తెలియక అప్పటికప్పుడు రిలీజ్ చేశారు సినిమాని. పవర్ స్టార్ స్టామినా & స్టార్ డమ్ మరియు త్రివిక్రమ్ టేకింగ్ కలిసొచ్చి సినిమా ఇండస్ట్రీ హిట్ అయ్యిందనుకోండి అది వేరే విషయం. ఆ తర్వాత మళ్ళీ రామ్ చరణ్ “ఎవడు” చిత్రంలోని కొన్ని కీలక సన్నివేశాలు కూడా విడుదలకు కొన్ని నెలల ముందే లీక్ అయ్యాయి. ఇక విడుదల ఏకంగా ఏడాది ముందు “బాహుబలి” సినిమాలోని అత్యంత కీలకమైన క్లైమాక్స్ ఫైట్ సీక్వెన్స్ లీక్ అవ్వడం చిన్నసైజు సంచలనం సృష్టించింది. లక్కీగా ఆ ఫైట్ సీన్ కి సీజీ వర్క్ ఇంకా కంప్లీట్ అవ్వకపోవడంతో ప్రేక్షకులు పెద్దగా పట్టించుకోలేదు.

రీసెంట్ గా ఈ లీకేజ్ ఎఫెక్ట్ విజయ్ దేవరకొండ నటించిన “గీత గోవిందం” మీద కూడా పడింది. సినిమాలోని రెండు సీన్లు విడుదలకు ముందే లీక్ అయ్యాయి. అయితే.. ఇలా విడుదలకు ముందే సినిమాలోని కొన్ని సన్నివేశాలు లీక్ అవ్వడం, అలా లీక్ కాబడిన సినిమాలు సూపర్ హిట్ అవ్వడం అనేది ఇప్పుడు సెంటిమెంట్ అయిపోయింది. దాంతో ఇప్పుడు విజయ్ దేవరకొండ తదుపరి చిత్రమైన “ట్యాక్సీవాలా” కూడా లీకై ఉండడంతో ఆ సినిమా కూడా తప్పకుండా పెద్ద హిట్ అవ్వడం ఖాయం అని సెంటిమెంట్ ను ఫాలో అయిపోతున్నారు విజయ్ దేవరకొండ ఫ్యాన్స్.