యువ దర్శకుడు అజయ్ భూపతి తెరకెక్కించిన ఆర్ఎక్స్ 100 మూవీ చిన్న చిత్రంగా వచ్చి పెద్ద విజయాన్ని అందుకుంది. బడ్జెట్ ని రెండురోజుల్లో రాబట్టిన ఈ సినిమా 20 కోట్ల గ్రాస్ ని అధిగమించి దూసుకుపోతోంది. ఈ చిత్రంపై పక్క పరిశ్రమలవారు ఆసక్తిని పెంచుకున్నారు. బాలీవుడ్ లో, కోలీవుడ్ లో రీమేక్ చేయడానికి భారీ మొత్తం చెల్లించి హక్కులను సొంతం చేసుకున్నారు. హిందీలో ప్రముఖ నిర్మాణ సంస్థ ఫాంటమ్ పిక్చర్స్ “ఆర్ఎక్స్ 100 ” ను రీమేక్ పనులు మొదలు పెట్టింది. తెలుగు సినిమాని తెరకెక్కించిన అజయ్ భూపతి హిందీ వెర్షన్ కు దర్శకత్వం వహించనున్నారు. తమిళ రీమేక్ హక్కుల్ని ప్రముఖ నటుడు ఆది పినిశెట్టి తీసుకున్నారు.
అతను సొంత నిర్మాణ సంస్థలో ఈ చిత్రాన్ని చేయనున్నారు. అజయ్ భూపతి హిందీలో బిజీ కావడంతో వేరే దర్శకుని పేరు పరిశీలిస్తున్నారు. ఒకే కాగానే అధికారికంగా ప్రకటించారు. కార్తికేయ పోషించిన రోల్ ని ఆది చక్కగా పోషించగలరని అందరూ భావిస్తున్నారు. తమిళ నేటివిటీకి తగ్గట్టుగా స్క్రిప్ట్ లో మార్పులు కూడా జరుగుతాయని సమాచారం. హీరోగా ఎంట్రీ ఇచ్చిన ఆది క్లిక్ కాలేకపోయారు. విలన్ పాత్రలో అదరగొట్టారు. ఇప్పుడు హీరోగా నిలదొక్కుకోవడానికి ట్రై చేస్తున్నారు. ఆర్ ఎక్స్ 100 కథ హిట్ ట్రాక్ లోకి తీసుకొస్తుందని ఆది నమ్మకంగా ఉన్నారు.
Home