రచయితలు నటులుగా మారడం అనేది కొత్తేమీ కాదు. ఇదివరకు చాలామంది రచయితలు నటులుగా సినిమాల్లో మెరిశారు. అయితే.. రచయిత కోన వెంకట్ మాత్రం “ఎందుకంటే ప్రేమంట” సినిమాలో ప్రతినాయకుడిగా కనిపించాడు. ఆ సినిమా ఫ్లాప్ అవ్వడంతో ఆయన పోషించిన పాత్ర ఎవరూ పట్టించుకోలేదనుకోండి. ఇప్పుడు కోన వెంకట్ అడుగుజాడల్లో మరో రచయిత విలన్ గా నటించేందుకు సన్నద్ధమవుతున్నాడు.
“బొమ్మరిల్లు” చిత్రంతో రచయితగా తనకంటూ ప్రత్యేకమైన పేరు సంపాదించుకొన్న అబ్బూరి రవి త్వరలో శశికిరణ్ అడివి దర్శకత్వంలో తెరకెక్కనున్న ఓ చిత్రంలో ప్రతినాయకుడిగా నటించనున్నాడు. ఇదివరకు కూడా అబ్బూరి రవిని చాలామంది దర్శకులు తమ చిత్రాల్లో విలన్ గా లేదా వేరే ఏదైనా పాత్రలో నటించమని అడిగారాట. అయితే.. రవికి ఈ పాత్ర విపరీతంగా నచ్చేయడంతో శశికిరణ్ సినిమాలో నటించడానికి ఒకే చెప్పాడట. మరి ఈ సినిమా విడుదల అనంతరం అబ్బూరి రవి ఆర్టిస్ట్ గా బిజీ అయిపోతాడేమో చూడాలి.
