‘ఖడ్గం’ సినిమాలో ‘ఒక్క ఛాన్స్ ఒకే ఒక్క ఛాన్స్’ అంటూ అమాయకపు నటనతో అందరినీ ఆకట్టుకున్న సంగీత అందరికీ గుర్తుండే ఉండుంటుంది. ‘పెళ్ళాం ఊరెళితే’ ‘సంక్రాంతి’ ‘ఈ అబ్బాయి చాలా మంచోడు’ వంటి చిత్రాల్లో కూడా నటించింది. తాజాగా సంగీత పై ఆమె తల్లి భానుమతి పోలీస్ కేసు ఫైల్ చేసిన సంగతి తెలిసిందే. ఇంటి నుండి తనను వెళ్ళిపొమ్మని సంగీత తనని వేధిస్తోందని… ఈ వయసులో నేనెక్కిడికి వెళ్ళగలనని మహిళా కమిషన్ కి ఫిర్యాదు చేసింది భానుమతి. తన ఆస్తిని కొట్టెయ్యడానికి సంగీత ఇలా చేస్తుందని ఆరోపించడంతో సోషల్ మీడియాలో సంగీతపై విమర్శలు మొదలయ్యాయి. దీంతో ఆమె తన తల్లిని ఉద్దేశిస్తూ సోషల్ మీడియాలో ఓ పోస్ట్ పెట్టడం అందరినీ ఆశ్చర్యానికి గురిచేసింది.
ఈ లేఖ ద్వారా సంగీత స్పందిస్తూ .. ”ప్రియమైన అమ్మా.. నన్ను ఈ ప్రపంచంలోకి తీసుకొచ్చినందుకు ధన్యవాదాలు.. నన్ను స్కూల్ కి దూరం చేసి 13 ఏళ్ళ వయసు నుండే పని చేయించినందుకు థాంక్యూ.. నాతో ఖాళీ చెక్కుల మీద సంతకాలు చేయించినందుకు కృతజ్ఞతలు. మందు, డ్రగ్స్ కి బాని సై జీవితంలో ఏరోజూ కనీసం పనికి వెళ్ళని నీ కుమారుడి సౌకర్యాల కోసం నన్ను దోపిడీ చేసినందుకు థాంక్స్. నేను పోరాడే వరకూ నాకు పెళ్ళి చేయకుండా ఉన్నందుకు థాంక్స్. నన్ను, నా భర్తని రోజూ వేధిస్తూ మా కుటుంబ ప్రశాంతతను దూరం చేసినందుకు థాంక్స్. ఓ తల్లి ఇలా ఉండకూడదని నాకు తెలియజేసినందుకు థాంక్స్. చివరిగా నువ్వు చేసిన తప్పుడు ఆరోపణలకు థాంక్స్. నీకు తెలిసో.. తెలియకో.. నోరులేని అమ్మాయి నుండీ పోరాడే మహిళగా మారేలా చేశావు. ఈ విషయంలో నువ్వు నాకు నచ్చావ్.. ఏదోక రోజు నీ పొగరు పక్కన పెట్టి నన్ను చూసి కచ్చితంగా గర్వపడతావు” అంటూ ఎమోషనల్ గా ‘నువ్వు నాకు నచ్చావ్’ స్టైల్ లో లెటర్ రాసింది.
