యువ దర్శకుడు అజయ్ భూపతి తెరకెక్కించిన ఆర్ఎక్స్ 100 మూవీ సంచలన విజయం సాధించింది. బడ్జెట్ ని రెండురోజుల్లో రాబట్టిన ఈ సినిమా ప్రపంచవ్యాప్తంగా 20 కోట్ల షేర్ ని రాబట్టి ఆశ్చర్య పరిచింది. దీంతో అతనికి బాలీవుడ్ నుంచి సైతం ఆఫర్లు వెల్లువెత్తాయి. గురువు రామ్ గోపాల వర్మ కూడా శిష్యుడు అజయ్ భూపతి దర్శకత్వంలో సినిమా నిర్మించాలని అనుకున్నారు. ఇక హీరోల్లో నితిన్, రామ్ లు అజయ్ కి ఫోన్ చేసి మంచి కథ ఉంటే నటించడానికి సిద్ధమని చెప్పారు. వీరిద్దరిలో రామ్ ని డైరక్ట్ చేయడానికి అజయ్ సిద్ధంగా ఉన్నట్టు తెలిసింది. అయితే ఇది మల్టీ స్టారర్ మూవీని అని టాక్.
మరో హీరోగా మలయాళ యూత్ సూపర్స్టార్ దుల్కర్ సల్మాన్ (మహానటి ఫేమ్) నటించే అవకాశం ఉందని సమాచారం. రామ్ పెద్దనాన్న స్రవంతి రవి కిషోరే ఈ చిత్రాన్ని నిర్మించనున్నారనేది ఖాయం అయింది. ప్రస్తుతం రామ్.. త్రినాధరావు నక్కిన దర్శకత్వంలో “హలో గురు ప్రేమ కోసమే” చేస్తున్నారు. అనుపమ పరమేశ్వరన్ హీరోయిన్ గా నటిస్తున్న ఈ సినిమా షూటింగ్ చివరి దశకు చేరుకుంది. దిల్ రాజు నిర్మిస్తున్న ఈ చిత్రాన్నీ దసరా కానుకగా అక్టోబర్ 18వ తేదీన రిలీజ్ చేయనున్నారు. ఆ తర్వాత రామ్, అజయ్ భూపతి మూవీ పట్టాలెక్కనుంది.
