ఒక్క సినిమాతో టాలీవుడ్ లో హాట్ టాపిక్ అయిన డైరక్టర్ అజయ్ భూపతి. అతని దర్శకత్వంలో తెరకెక్కిన “ఆర్ ఎక్స్ 100” సినిమాకు నెగిటివ్ ఎండింగ్ ఉన్నప్పటికీ.. పాజిటివ్ టాక్ తో దూసుకుపోతోంది. రామ్ గోపాల్ వర్మ దగ్గర అసిస్టెంట్ గా చేసిన అజయ్.. అతనిలా తొలి సినిమాతోనే హిట్ అందుకున్నారు. ఈ సినిమా షేర్స్, గ్రాస్ లెక్కలు హంగామా చేస్తుంటే.. మరో న్యూస్ వైరల్ అవుతోంది. అదే ప్రభాస్ కు అజయ్ భూపతి ఏమవుతారు?. ఈ ప్రశ్న ను ముందుగా వర్మ సంధించారు. దీంతో పెద్ద చర్చ మొదలయింది. రీసెర్చ్ ప్రారంభమయింది. ఈ విషయం అజయ్ భూపతి వద్దకు వెళ్లడంతో అతను క్లారిటీ ఇచ్చారు.
“ప్రభాస్ నాకు దూరపు చుట్టం అవుతారు. నా కజిన్ వైఫ్.. ప్రభాస్ బంధువు. అలా మాకు బంధుత్వం కలిసింది. అంతకుమించి ఏమీ లేదు.” అని స్పష్టం చేశారు. తాను ఇంత వరకు ప్రభాస్ ను కలవనే లేదని.. త్వరలోనే కలుస్తానని అజయ్ చెప్పారు. “ఆర్ ఎక్స్ 100 ” సినిమాకి ముందు అజయ్ భూపతి పేరు పెద్దగా ఎవరికీ తెలియదు. ఈ సినిమా కలక్షన్ల వర్షం కురిపించడంతో అతనితో సినిమా చేయాలనీ నిర్మాతలు ఆశపడుతున్నారు. యువ హీరోలు కూడా అజయ్ దర్శకత్వంలో నటించడానికి ఉత్సాహంగా ఉన్నారు. మరి ఏ హీరోతో అతను సినిమా చేస్తారనేది ఆసక్తికరంగా మారింది.
