ఇక ఈ జనరేషన్ లగ్గాయిత్తు మన మిల్క్ వైట్ బ్యూటీనే

1990 టైమ్ లో “లగ్గాయిత్తు” అనగానే అందరికీ రమ్యకృష్ణ గుర్తొచ్చేదట. అదే తరహాలో ఈ తరహానికి “లగ్గాయిత్తు” అంటే తమన్నా గుర్తొస్తుందేమో. ఎందుకా అనుకొంటున్నారా.. నాగచైతన్య హీరోగా తెరకెక్కుతున్న “సవ్యసాచి” చిత్రంలో కథానాయికగా నిధి అగర్వాల్ నటిస్తుండగా.. ఈ చిత్రంలో “అల్లరి అల్లుడు” చిత్రంలోని “నిన్ను రోడ్డు మీద చూసినాది లగ్గాయిత్తు” అనే పాటను రీమిక్స్ చేస్తున్నారన్న విషయం తెలిసిందే. తొలుత ఈ రీమిక్స్ లో చైతూతో కలిసి రకుల్ లేదా రాశీఖన్నా చిందులేసే అవకాశం ఉందని వార్తలొచ్చినా..

ఫైనల్ గా మాత్రం తమన్నా ఫిక్స్ అయ్యిందని తెలుస్తోంది. ఆల్రెడీ చైతూతో కలిసి “100% లవ్, తడాఖా” చిత్రాల్లో కలిసి నటించిన తమన్నా.. ఇప్పుడు ముచ్చటగా మూడోసారో చైతూతో కలిసి ఆడిపాడనుంది. త్వరలోనే అన్నపూర్ణ స్టూడియోలో వేసే ఓ భారీ సెట్ లో చిత్రీకరిస్తారట. అసలే స్పెషల్ సాంగ్స్ చేయడంలో సిద్ధహస్తురాలైన తమన్నా.. తన పాల తెలుపు అందాలను సవ్యసాచి కోసం ఏమేరకు ఆరబోస్తుందో చూడాలి. చందు మొండేటి దర్శకత్వంలో తెరకెక్కుతున్న ఈ చిత్రాన్ని మైత్రీ మూవీ మేకర్స్ సంస్థ నిర్మిస్తుండగా.. జూన్ 14న ఈ చిత్రం విడుదలకానుంది.