బన్నీపై డైరెక్టర్స్ అసోసియేషన్ గుర్రు, తన తప్పేమీ లేదంటున్న బన్నీ

ఈమధ్యకాలంలో అల్లు అర్జున్ తన సినిమాల ద్వారా కంటే తన చేష్టల ద్వారానే ఎక్కువగా వార్తల్లో నిలుస్తున్నాడు. “చెప్పను బ్రదర్” అంటూ పవన్ కళ్యాణ్ ఫ్యాన్స్ కోపాగ్నిని చవిచూసిన బన్నీ.. అనంతరం వేరే ఆడియో ఫంక్షన్స్ లో పీకిన అనవసరమైన క్లాసులకు అభాసుపాలైన విషయం తెలిసిందే. అవన్నీ బన్నీతోపాటు జనాలు కూడా మర్చిపోయి త్రివిక్రమ్ కాంబినేషన్ లో తెరకెక్కుతున్న క్రేజీ ఫిలిమ్ హడావుడిలో పడిపోయారు. అయితే.. బన్నీ తన ఆటిట్యూడ్ కారణంగా మళ్ళీ వార్తల్లో నిలిచాడు.

త్రివిక్రమ్ సినిమా సెట్స్ లో బన్నీ సీనియర్ అసిస్టెంట్ డైరెక్టర్ అయిన సత్యం అనే వ్యక్తిని అవమానించాడట. అతను సీన్ కోసం క్యారీవ్యాన్ నుంచి సెట్స్ కు రమ్మని ఒకటికి రెండుసార్లు చెప్పడంతో చిరాకుపడిన బన్నీ.. స్క్రిప్ట్ పేపర్స్ విసిరేశాడట. దాంతో బాగా హర్ట్ అయిన సత్యం డైరెక్టర్స్ అసోసియేషన్ లో కంప్లైంట్ కూడా చేశాడట.

అయితే.. బన్నీ & టీం నుంచి మరో కోణం తెలుస్తోంది. అదెంటంటే.. అసిస్టెంట్ డైరెక్టర్ సత్యం షూటింగ్ సరిగా ప్లాన్ చేయని కారణంగా అల్లు అర్జున్ చాలా ఇంపార్టెంట్ మీటింగ్ మిస్ అయ్యాడట. ఆ కారణంగానే సత్యం మీద కోప్పడ్డాడు కానీ సత్యం పేర్కొన్నట్లు స్క్రిప్ట్ పేపర్లు విసిరేయడం లాంటివి చేయలేదట. కానీ.. డైరెక్షన్ డిపార్ట్ మెంట్ మాత్రం అందులో తమ తప్పేమే లేదని, వేరే సీనియర్ ఆర్టిస్ట్ డేట్ క్లాష్ కారణంగా సెట్స్ కి రాకపోవడంతో షూటింగ్ క్యాన్సిల్ చేయాల్సి వచ్చిందే కానీ.. తమ ప్లానింగ్ ప్రోబ్లమ్ కాదని చెప్పుకొచ్చారు. మరి ఈ విషయమై దర్శకుల సంఘం ఎలా రియాక్ట్ అవుతుంది అనేది చూడాలి.