అలా అన్నప్పుడల్లా.. నా ముగ్గురు కొడుకులు భయపడుతున్నారు : అల్లు అరవింద్

టాలీవుడ్ స్టార్ ప్రొడ్యూసర్స్ లిస్ట్ లో ఇప్పటికీ అల్లు అరవింద్ నెంబర్ 1 ప్లేస్ లోనే ఉన్నారు అని చెప్పడంలో ఎటువంటి సందేహం లేదు. ‘గీతా ఆర్ట్స్’ బ్యానర్ పై ఆయన అనేక.. బ్లాక్ బస్టర్ సినిమాల్ని అందించారు. ఆయన నిర్మాణంలో సినిమా రూపొందుతోంది అంటే కచ్చితంగా హిట్ సినిమానే అని ప్రేక్షకులు కూడా ఫిక్స్ అయిపోతారు. ఆయన జడ్జ్ మెంట్ అంత పక్కాగా ఉంటుంది. ఇక గీతా ఆర్ట్స్ 2.. అయిన ‘జిఏ2 పిక్చర్స్’ బ్యానర్ ను కూడా ఏర్పాటు చేసి.. టైర్ 2 హీరోలతో మీడియం బడ్జెట్ సినిమాలను నిర్మిస్తూ వస్తున్నారాయన.

ఈ బ్యానర్ కి సంబంధించిన పూర్తి బాధ్యతల్ని బన్నీవాసుకి అప్పగించిన సంగతి తెలిసిందే. అల్లు అరవింద్ పెట్టుకున్న నమ్మకాన్ని బన్నీ వాసు నిలబెట్టుకుంటూనే వస్తున్నాడు. ఇక తాజాగా ‘ప్రతిరోజూ పండగే’ సినిమా తీసి మరో ఘన విజయాన్ని సొంతం చేసుకున్నాడు బన్నీ వాస్. ఈ చిత్రం ఆల్రెడీ బ్రేక్ ఈవెన్ సాధించి సూపర్ హిట్ దిశగా పరుగులు తీస్తుంది. ఇక ఈ చిత్రం సక్సెస్ మీట్లో భాగంగా అల్లు అరవింద్ మాట్లాడుతూ, “బన్నీ వాసు అంటే నాకు చాలా ఇష్టం .. అతను నా కొడుకులాంటివాడే. ఇతనితో కలిపి నాకు నలుగురు కొడుకులు. ‘బన్నీవాసు నా నాలుగో కొడుకు’ అన్నప్పుడల్లా… అతనికి కూడా ఆస్తులు రాసిస్తానేమోనని నా ముగ్గురు కొడుకులు భయపడుతుంటారు” అంటూ కామెడీ చేశారు అల్లు అరవింద్.