నేను సింగిల్ గా ఉన్నాను మొర్రో అన్నా నమ్మరేం ??

“ఇద్దరం మంచి స్నేహితులమంతే. మీడియాలో ఏవేవో రాస్తున్నారు. మా మధ్య ప్రేమా.. గీమా.. ఏమీ లేదు..” ఈ డైలాగ్ ఎక్కడో విన్నట్టుందా! మీరూ, ఫలానా కథానాయకుడూ ప్రేమలో ఉన్నారట? అని ఏ కథానాయికను ప్రశ్నించినా చెప్పే సమాధానమే ఇది. తెలుగు, తమిళం, హిందీ.. ఏ భాషా మినహాయింపు కాదిక్కడ. తాజాగా ఇరవై ఏడేళ్ల శ్రద్ధా కపూర్ సైతం ఇదే సమాధానం చెప్పింది. ఆదిత్యా రాయ్ కపూర్, శ్రద్ధా కపూర్ ప్రేమలో ఉన్నారని.. ఎప్పట్నుంచో డేటింగ్ చేస్తున్నారని.. ముంబైలో గుసగుసలు వినిపిస్తున్నాయి. ‘ఆషికి 2’లో వెండితెరపై ఈ రొమాంటిక్ కపుల్ మధ్య కెమిస్ట్రీ అంతలా పండడానికి తెరవెనుక ప్రేమే కారణమన్నారు. మూడేళ్ల తర్వాత మళ్లీ వీరిద్దరూ కలసి నటిస్తున్నారు. మణిరత్నం ‘ఓకే బంగారం’ హిందీ రీమేక్ ‘ఓకే జాను’లో సందడి చేయనున్నారు. ప్రస్తుతం చిత్రీకరణ జరుగుతోంది. మళ్లీ ప్రేమ వార్తలు మొదలయ్యాయి.
దీనిపై శ్రద్ధాను ప్రశ్నించగా.. “ప్రజలు నాగురించి రాసే వార్తలను కంట్రోల్ చేయలేను. అవి నాపై ప్రభావమూ చూపలేవు. కేవలం నా పనిపై మాత్రమే దృష్టి పెట్టాను. ఆదిత్యా, నేనూ ఇటువంటి ఊహాజనిత, కల్పిత వార్తల గురించి మాట్లాడుకున్నాం, చూసి నవ్వుకున్నాం. వ్యక్తిగత జీవితం వృత్తిపరమైన అంశాలతో ముడిపడి ఉండదు. ఒకవేళ మీరు ఎవరితోనైనా ప్రేమలో ఉన్నా.. లేకున్నా.. నటిగా మీ భాద్యత మీరు నిర్వర్తించాలి. ప్రస్తుతం నేను ఒంటరి. ఓ తోడు కోసం ఎవరూ అన్వేషణ చేయరు. ప్రేమలో పడవలసిన సమయంలో పడతామంతే” అని సమాధానం చెప్పింది.