అతి తక్కువ చిత్రాలతో భారీ క్రేజ్ సొంతం చేసుకున్న నటుడు విజయ్ దేవరకొండ. పెళ్లి చూపులు, అర్జున్ రెడ్డి, గీత గోవిందం సినిమాలతో వరుసగా బ్లాక్ బస్టర్ హిట్స్ సొంతం చేసుకొని స్టార్ హీరోగా పాపులారిటీ సొంతం చేసుకున్నారు. అలా సినీ పరిశ్రమలో స్థిరపడిపోగానే విజయ్ తన తమ్ముడు ఆనంద్ దేవరకొండని హీరోగా పరిచయం చేయడానికి సిద్ధం అయిపోయారు. ఇప్పటికే బ్యాగ్రౌండ్ వర్క్ మొత్తం పూర్తి చేసినట్లు తెలిసింది. కొన్ని షార్ట్‌ ఫిలిమ్స్ తో నెటిజనుల నుంచి అభినందనలు అందుకున్న కేవీఆర్‌ మహేంద్ర చెప్పిన లవ్ స్టోరీ నచ్చడంతో విజయ్ దేవరకొండ.. అతని దర్శకత్వంలోనే తమ్ముడిని హీరోగా పరిచయం చేబోతున్నారు.
హీరోయిన్ కూడా ఫిక్స్ అయిపోయింది. రాజశేఖర్‌, జీవిత దంపతుల చిన్న కూతురు శివాత్మిక ఆనంద్ కి జోడీగా నటించనుంది. ఇద్దరికీ ఇదే తొలి చిత్రం. తెలంగాణ నేపథ్యంలో కథ సాగుతుందని సమాచారం. సురేష్‌ బాబు సమర్పణలో యష్‌ రంగినేని, మధుర శ్రీధర్‌లు సంయుక్తంగా నిర్మించనున్న ఈ సినిమా అక్టోబర్‌ 10న ప్రారంభం కానుంది. అన్న మాదిరిగా తమ్ముడు కూడా సాఫ్ట్ గా ఎంట్రీ ఇచ్చి నేటి యువహీరోలకు పోటీ ఇవ్వొచ్చని సినీ విశ్లేషకులు భావిస్తున్నారు. శివాత్మిక కూడా తల్లికి తగ్గ తనయురాలిగా నిరూపించుకుంటుందని అంచనా వేస్తున్నారు.
