రాను రాను అంటూనే చిన్నదో…రాములోరి గుడికి వచ్చే చిన్నది అనే పాట మాదిరిగా… యాంకర్ అనసూయ ఐటెం సాంగ్స్ చేయనంటూనే.. సాయి ధరమ్ తేజ్ సినిమా విన్నర్ లో ఓ ప్రత్యేక సాంగ్ చేసింది. జబర్దస్త్ షో తో పాటు అనేక టీవీ షోలతో బిజీగా ఉన్న అనసూయ.. వీలు దొరికినప్పుడల్లా… సోషల్ మీడియా వేదికపై అభిమానులతో మాట్లాడుతుంటుంది. వారు అడిగిన ప్రశ్నలకు ఓపిగ్గా సమాధానం చెబుతుంటుంది. నిన్న ట్విట్టర్ లో అనసూయ లైవ్ చాట్ కి వచ్చింది. ఈ సమయంలో ఆమె అభిమానులు అనేక ప్రశ్నలు అడిగారు. వాటిలో రామ్ చరణ్, సుకుమార్ కలయికలో వస్తున్న రంగస్థలం సినిమా గురించి కూడా ఉన్నాయి.
ఎందుకంటే సమంత హీరోయిన్ గా నటిస్తున్న ఈ చిత్రంలో అనసూయ కీలక రోల్ పోషిస్తోంది కాబట్టి. గతంలో తన పేస్ కనబడకుండా ఓ ఫోటోని పోస్ట్ చేసి అనేక ప్రశ్నలకు తెరలేపింది. ఎక్కువమంది రంగస్థలంలో అనసూయ రామ్ చరణ్ కి అత్త రోల్ చేస్తున్నట్టు భావించారు. అలాగే ప్రచారం కూడా సాగింది. ఇది నిజమేనా? అని ఓ అభిమాని నేరుగా అనసూయని అడిగాడు. అందుకు ఆమె రోల్ ఏమిటో చెప్పకుండా అత్తగా మాత్రం నటించడం లేదని స్పష్టం చేసింది. మరి ఏ రోల్ చేస్తుందో అని అభిమానుల్లో ఆత్రుతని కలిగించింది. పాతికేళ్ల క్రితం నాటి కథతో రూపుదిద్దుకుంటున్న రంగస్థలం షూటింగ్ పూర్తి చేసుకుని మార్చి 30 న రిలీజ్ కావడానికి సిద్ధమవుతోంది.
