అనిల్ రావిపూడి దశ తిరిగింది..!

పాపం “అ ఆ” సినిమాతో సూపర్ హిట్ కొట్టానని సంతోషించి ఆ సినిమా సక్సెస్ ను ఎంజాయ్ చేయకుండానే “లై” షూటింగ్ మొదలెట్టిన నితిన్ ఆ సినిమాపై భారీ అంచనాలు పెట్టుకొన్నాడు. సరికొత్త స్టైలింగ్ ట్రై చేయడంతోపాటు ట్రైలర్, సాంగ్స్ ఆడియన్స్ ను బాగా ఎట్రాక్ట్ చేయడంతో “లై”సూపర్ హిట్ అవ్వడం ఖాయమని భావించారు. కట్ చేస్తే.. సినిమా డిజాస్టర్ కి ఎక్కువ, ఫ్లాప్ కి తక్కువ అనే స్థాయిలో ఉండిపోయింది. దాంతో షాక్ అయిన నితిన్ అప్పటికి కమిట్ అయిన త్రివిక్రమ్ ప్రొడక్షన్ లో కృష్ణచైతన్య దర్శకత్వంలో తెరకెక్కుతున్న “అక్కడ అమ్మాయి.. ఇక్కడ అబ్బాయి” (వర్కింగ్ టైటిల్) షూట్ లో బిజీగా అయిపోయి “లై” ఫెయిల్యూర్ నుంచి బయటకు రావడానికి విశ్వప్రయత్నం చేస్తున్నాడు.

అయితే.. తాజా సమాచారం ప్రకారం కృష్ణచైతన్య సినిమా అనంతరం నితిన్ మరో సినిమా ఒకే చేసినట్లు తెలుస్తోంది. “పటాస్, సుప్రీమ్, రాజా ది గ్రేట్” చిత్రాలతో హ్యాట్రిక్ హిట్ అందుకొన్న అనిల్ రావిపూడి చెప్పిన కథ నితిన్ తోపాటు ఆయన తండ్రి సుధాకర్ రెడ్డికి కూడా విపరీతంగా నచ్చడంతో స్వంత బ్యానర్ లోనే అనిల్ రావిపూడి దర్శకత్వంలో ఒక సినిమా నిర్మించేందుకు సన్నద్ధమవుతున్నాడట. ఎలాంటి హీరోనైనా సరే స్క్రిప్ట్ ప్రకారం మౌల్డ్ చేసి కథకు అవసరమైన నటన రాబట్టుకోవడంలో సిద్ధహస్తుడైన అనిల్ రావిపూడి అసలే “లై” ఫ్లాప్ తో ఢీలాపడ్డ నితిన్ కోసం మాంచి ఎంటర్ టైనింగ్ స్క్రిప్ట్ సిద్ధం చేశాడట. మరి అది ఎలాంటి స్క్రిప్ట్, ఎప్పుడు మొదలవుతుంది అనేది తెలియాలంటే కొన్ని రోజులు ఆగాల్సిందే.