రచయిత వక్కంతం వంశీ తొలిసారి మెగాఫోన్ పట్టి.. దర్శకత్వం వహించిన చిత్రం “నా పేరు సూర్య”. ఈ సినిమాలో స్టైలిష్ స్టార్ అల్లు అర్జున్ యాంగ్రీ సోల్జర్ గా కనిపించబోతున్నారు. అతనికి జోడీగా అను ఇమ్యానుయేల్ నటించింది. లగడపాటి శ్రీధర్‌ నిర్మించిన ఈ మూవీ శుక్రవారం రిలీజ్ కానుంది. ఈ సినిమా ప్రమోషన్లో భాగంగా మీడియా ముందుకు వచ్చిన అను ఇమ్యానుయేల్ అనేక ఆసక్తికర సంగతులు చెప్పారు. “నా పేరు సూర్య సినిమాలో అవకాశం వచ్చినందుకు ఆనందంగా ఉంది. ఇందులో నేను వర్ష అనే ఆర్ట్స్‌ విద్యార్థి పాత్ర పోషించా. సినిమాలో వర్ష పాత్ర నా రియల్‌ క్యారెక్టర్‌ ఒకేలా ఉంటాయి. అందుకే త్వరగా కనెక్ట్‌ అయ్యాను” అని వివరించారు. ఇక అల్లు అర్జున్ గురించి మాట్లాడుతూ…”పని పట్ల అర్జున్‌కి ఉన్న నిబద్ధత నాకు స్ఫూర్తినిచ్చింది. సినిమానే అతని ఊపిరి.
సినిమాలో సూర్య పాత్ర రియల్‌గా ఉండేందుకు దుస్తులు, హెయిర్‌ స్టైల్‌, కనుబొమ్మపై గాటు ఇవన్నీ అర్జున్ ఆలోచనలే” అని ఆమె అన్నారు. అల్లు అర్జున్ తో డ్యాన్స్ చేయడంపై అభిప్రాయాన్ని కోరగా.. అందుకు అను ఇలా స్పందించారు. “ఈ సినిమా ఒప్పుకున్నప్పుడు నా మైండ్‌లో వచ్చిన థాట్ అదే. అసలు అల్లు అర్జున్‌తో డ్యాన్స్ చేయగలనా? అని డౌట్ వచ్చింది. “ఇరగ ఇరగ” పాటను ప్రేమ్‌ రక్షిత్‌ కొరియోగ్రాఫ్‌ చేశారు. ఇందులో నేను వేసిన స్టెప్పులు అంత కష్టంగా అనిపించవు కానీ బన్నీ డ్యాన్స్‌కు సరితూగేలా నేను ఎప్పటికీ చేయలేను” అని స్పష్టం చేశారు.
