సామాన్యులకు అయినా, సెలబ్రిటీలకు అయినా సమస్యలు కామన్. కష్టాలు, బాధలు అప్పుడప్పుడు పలకరిస్తుంటాయి. అలాంటి సమయంలో మానసికంగా కుంగిపోవద్దని స్వీటీ అనుష్క చెప్పింది. సినీ జీవితంలో అనేక విజయాలకు, కొన్ని అపజయాలను చూసిన ఈ బ్యూటీ మానసిక సంఘర్షణ, ఒత్తిడితో బాధ పడుతుంటే.. దాని నుంచి బయటికి రావడానికి మంచి చిట్కా చెబుతోంది. ‘‘నాకొచ్చిన సమస్యే చాలా పెద్దది అనేది అందరి భావన. చిన్న చిన్న ఇబ్బందుల్ని భూతద్దంలో చూస్తుంటారు. ఒక్కసారి అందులోంచి బయటకు రండి. చుట్టూ ఉన్న మనుషుల్ని, వాళ్ల సమస్యల్ని తెలుసుకోవడానికి ప్రయత్నించండి. వీలైతే ఓ అయిదుగురికి సహాయం చేయండి. సహాయం అంటే డబ్బులే కానక్కర్లేదు. ఒక్కోసారి మంచి మాట చెప్పడం కూడా గొప్ప విషయమే.
చుట్టుపక్కల ఉన్న వాళ్ల బాధలు వినండి. మీదెంత చిన్న సమస్యో అర్థం అవుతుంది. నేను పాటించే చిట్కా ఇదే. నాకెప్పుడైనా ఒత్తిడి అనిపిస్తే… ఎవరికో ఒకరికి సహాయం చేస్తుంటాను. లేదంటే.. వాళ్ల సమస్యల్ని అడిగి తెలుసుకుంటాను. వాటితో పోలిస్తే నా ఒత్తిడి చాలా చిన్నదనిపిస్తుంది’’ అని అనుష్క సొంత అనుభవాన్ని అభిమానులకు చెప్పింది. భాగమతి తర్వాత అనుష్క రెండు చిత్రాలకు సైన్ చేసింది. తెలుగులో సైలెన్స్ అనే సినిమా చేయనుండగా.. తమిళంలో గౌతం మీనన్ డైరక్షన్ లో నటించడానికి గ్రీన్ సిగ్నల్ ఇచ్చింది. ఈ రెండు సినిమాలు ఎప్పుడు సెట్స్ మీదకు వెలుతాయో ఇంకా అధికారికంగా ప్రకటన రాలేదు.
