అనేక సూపర్ హిట్ చిత్రాలను తెరకెక్కించిన డైరెక్టర్‌ మణిరత్నం ప్రస్తుతం బ్లాక్ బస్టర్ హిట్ కి దూరంగా ఉన్నారు. అటువంటి హిట్ సొంతంచేసుకోవాలని తాజాగా తెరకెక్కించిన మూవీ నవాబ్. అరవింద స్వామి, శింబు హీరోలుగా నటించిన ఈ సినిమా ట్రైలర్ రీసెంట్ గా రిలీజ్ అయి సంచలనం సృష్టిస్తోంది. ఇందులో ప్రకాష్ రాజ్ కీలక రోల్ పోషించారు. మాఫియా నేపథ్యంలో సాగె సినిమాలో ప్రేమ, పగలను సమపాళ్లలో మేళవించారు. ఇందుకు ఆస్కార్ అవార్డు గ్రహీత ఏఆర్ రెహమాన్ ఇచ్చిన సంగీతం పెద్ద ప్లస్ అయింది. ఈ సినిమా ప్రమోషన్లో భాగంగా చిత్ర బృందం హైద‌రాబాద్‌ కి వచ్చింది. మణిరత్నంతో పాటు ఏఆర్ రెహమాన్ కూడా ప్రెస్ మీట్ల‌లో పాల్గొన్నారు. ప్రింట్‌, ఎల‌క్ట్రానిక్‌, ఎఫ్ ఎమ్ మీడియాల‌కు రెహమాన్ ప్ర‌త్యేకంగా ఇంట‌ర్వ్యూలు ఇచ్చారు. అయితే… ‘సైరా’ గురించి మాత్రం ఏమీ అడ‌గొద్ద‌ని షరతు విధించారు.
ఎందుకంటే మెగాస్టార్ చిరంజీవి సినిమా సైరా నరసింహా రెడ్డికి మ్యూజిక్ డైరక్టర్ గా మొదట రెహమాన్ ని అనుకున్నారు. టెక్నీషయన్స్ గురించి వివరించే వీడియోలో ఇతని పేరు కూడా ఉంది. కానీ మొదలుకాకముందే టీమ్ నుంచి బయటికి వచ్చారు. “బిజీ షెడ్యూల్ వ‌ల్లే సైరా చేయ‌లేక‌పోయా” అని వివరణ కూడా ఇచ్చుకున్నారు. కానీ అదే ప్రశ్న మళ్ళీ మళ్ళీ వినడానికి ఇష్టపడని రెహమాన్ తన పీఆర్ టీమ్ తో.. ఆ ప్రశ్న అడగవద్దని షరతు విధించినట్టు తెలిసింది. మళ్ళీ మళ్ళీ వినడానికి ఇష్టంలేక షరతు విధించారా? లేకుంటే అసలు కారణం బయటికి వస్తుందని ముందుగానే జాగ్రత్త పడ్డారా అని టాలీవుడ్ వర్గాలవారు సెటైర్లు వేస్తున్నారు.
