@నర్తనశాలలో కామెడీ ఎక్కువగానే ఉండడనుంది

లవర్ బాయ్ గా నాగ శౌర్య పలు సినిమాల్లో అమ్మాయిల మనసుదోచుకున్నారు. ప్రేమను కళ్ళలో కురిపించగల ఈ యువ హీరో ఛలో తర్వాత సొంత బ్యానర్లో చేసిన మూవీ @నర్తనశాల. క్రియేటివ్ డైరక్టర్ కృష్ణవంశీ దగ్గర అనేక ఏళ్ళు అసిస్టెంట్ డైరక్టర్ గా పనిచేసిన శ్రీనివాస చక్రవర్తి దర్శకత్వంలో తెరకెక్కిన ఈ మూవీ రేపు రిలీజ్ కాబోతోంది. ఓవర్ సీస్ లో నేడు భారీగా ప్రీమియర్ షో లు వేయనున్నారు. అక్కడ ప్రచారం కూడా బాగా చేయడంతో మంచి ఓపెనింగ్స్ వస్తాయని అంచనా వేస్తున్నారు. యామిని భాస్కర్‌ హీరోయిన్ గా నటించిన ఈ చిత్రం టీజర్ రీసెంట్ గా రిలీజ్ అయి మంచి స్పందన అందుకుంది. అలాగే మహతి స్వర సాగర్ స్వర పరిచిన గీతాలు కూడా సినిమాపై అంచనాలను పెంచాయి.

ఇందులో నాగశౌర్య గే గా నటించారు. అది కూడా ప్రేమ కోసం అలా కనిపిస్తారు. ఈ క్రమంలో కామెడీ సన్నివేశాలు బాగా పండాయని తెలిసింది. ఈరోజు రిలీజ్ చేసిన కామెడీ ప్రోమో వీడియో ఆ విషయాన్ని స్పష్టం చేసింది. ఓ వైపు ప్రేమ.. మరో వైపు కామెడీతో రెండున్నరగంటలపాటు @నర్తనశాల వినోదాన్ని పంచనున్నట్లు చిత్ర బృందం స్పష్టం చేసింది. ఈ మూవీపై అన్ని విధాలుగా పాజిటివ్ టాక్ వినిపిస్తోందని ఫిలిం నగర్ వాసులు చెప్పారు. ఛలో రికార్డులను బద్దలు కొట్టే ఆస్కారం ఉందని భావిస్తున్నారు.