Salman Khan: కండలు చూపించడానికొచ్చి కంగుతిన్నాడట!

November 24, 2021 / 09:15 PM ISTByFilmy Focus

Join Us

Salman Khan: కండలు చూపించడానికొచ్చి కంగుతిన్నాడట!

తాతకు దగ్గులు నేర్పకుడు, కోతి ముందు కుప్పి గంతులు… ఇలాంటి చాలా సామెతలు వినే ఉంటారు. కొన్ని ప్రాక్టికల్‌ చేసో లేక చూసి ఉంటారు. బాలీవుడ్‌ సూపర్‌ స్టార్‌ సల్మాన్ ఖాన్‌ ఇంట్లో కూడా ఇలాంటిది ఒకటి జరుగుతూ ఉంటుంది అట. అదే ‘భాయ్‌ ముందు బామ్మర్ది ఆటలు’. సల్మాన్ ఖాన్‌ ముందు తన ఫిట్‌నెస్‌ను, బాడీని చూపించి మెప్పు పొందాలని బావమరిది ఆయుష్‌ శర్మ చాలా రోజులుగా ప్రయత్నిస్తున్నాడట. ఈ క్రమంలో ప్రతిసారి శృంగభంగమే ఎదురవుతోందట. తాజాగా ఈ సరదా విషయాలను ఆయుష్‌ శర్మ చెప్పుకొచ్చాడు.

సల్మాన్ సోదరి అర్పితా ఖాన్‌ను పెళ్లి చేసుకునేటప్పుడు ఆయుష్‌ శర్మ బక్కగా ఉండేవాడు. సినిమాల్లోకి పూర్తిస్థాయి ఎంట్రీ ఇవ్వడానికి సిద్ధమవుతున్న సమయంలో బాడీ బిల్డింగ్‌ ప్రారంభించాడు. దానికి తోడు సల్మాన్‌ ఇంట్లో మగాళ్లందరూ బాడీని ఫిట్‌గా ఉంచుకుంటారు. ఇంకా చెప్పాలంటే వస్తాదుల్లా పెంచుతారు. దీంతో ఆయుష్‌ ఎలా అయినా కండలు పెంచి, తనేంటో నిరూపించుకోవాలి అనుకున్నాడట. జిమ్‌కి వెళ్లి, డైట్‌ పాటించి… ఓసారి చొక్కా విప్పి తన బాడీని సల్మాన్‌ ఎదుట ప్రదర్శించబోయాడట.

ఇంతలో సల్మాన్‌ చొక్కా విప్పి… తన బాడీ చూపించేసరికి కంగు తిన్న ఆయుష్‌… వెంటనే చొక్కా వేసేసుకొని వెళ్లిపోయాడట. ఎందుకంటే సల్మాన్‌ ముందు తన బాడీ ఏ మాత్రం సరితూగదు అని అర్థమైందట. మరోసారి స్విమ్మింగ్‌ పూల్‌ దగ్గర కూడా ఆయుష్‌ ఇలాంటి ప్రయత్నమే చేసి ఫెయిల్‌ అయ్యాడట. అయినా భాయ్‌లా బాడీ పెంచి… కాన్‌స్టంట్‌గా కొనసాగించడం అంటే చాలా కష్టం. ఇదే విషయం ఆయుష్‌కి తెలిసింది. ఆయన చెప్పడంతో మనకు తెలిసింది.