జాతీయ ఉత్తమ చిత్రం అవార్డును అందుకున్న బాహుబలి (ది బిగినింగ్) చిత్రం గురించి చైనీయులకు వివరించడానికి రాజమౌళి బృందం సిద్దమైంది. ఈ సినిమా జూన్ 24న చైనా లోని 600 థియేటర్లలో విడుదల కానుంది. ఈ సందర్భంగా చైనా పాత్రికేయులతో మంగళవారం ప్రెస్ మీట్ పెట్టారు. ఈ సమావేశంలో డైరక్టర్ రాజమౌళి, హీరో ప్రభాస్, హీరోయిన్లు తమన్నా, అనుష్క, విలన్ రానా, డీఓపీ సెంథిల్, మ్యూజిక్ డైరక్టర్ కీరవాణి, విజువల్ ఎఫెక్ట్స్ నిపుణులు పాల్గొన్నారు. సినిమా విశేషాలను తెలిపారు.
అంతర్జాతీయ స్థాయిలో ఇదివరకు రిలీజ్ చేసినా.. ప్రపంచ సినీ అభిమానుల కోరిక మేరకు ప్రాంతీయ భాషల్లో రిలీజ్ చేయడానికి చిత్రానికి ఆయా భాషల్లో డబ్బింగ్ ను పూర్తి చేసిన సంగతి తెలిసిందే. ఈ సారి సినిమా రన్ టైం ను ఇదివరకు ఉన్న నిడివి కంటే 20 నిముషాలు తగ్గించారు. ఆయా దేశాల్లో విదుదలయ్యే సినిమాల రన్ టైం ను దృష్టిలో పెట్టుకుని పాటలను, కొన్ని సన్నివేశాలను కుదించినట్లు తెలిసింది.
