వారం ముందే వస్తానంటున్న “బాబు బంగారం”

వెంకటేష్ నటిస్తున్న “బాబు బంగారం” టీజర్ మొన్న విడుదలై.. మంచి రెస్పాన్స్ రాబట్టుకొంది. మారుతి దర్శకత్వంలో తెరకెక్కుతున్న ఈ చిత్రాన్ని తొలుత జూలై 1న విడుదల చేద్దామనుకొన్నారు. కానీ.. అదే తేదీకి రాజనీకాంత్ “కబాలి” వస్తుండడంతో, జూలై 29న ఎటువంటి కంగారు లేకుండా సినిమాను విడుదల చేద్దామనుకొన్నారు దర్శకనిర్మాతలు. కానీ.. ఇప్పుడు “కబాలి” రెండు వారాలు లేటుగా జూలై 15న విడుదలవుతుండడంతో.. “బాబు బంగారం” చిత్రాన్ని ఓ వారం ముందుగా.. అంటే జూలై 23న “బాబు బంగారం” సినిమాను విడుదల చేయడానికి సన్నాహాలు చేసుకొంటున్నారు.

మరి “బాబు బంగారం” సినిమాను ఓ వారం ముందుగా విడుదల చేయడంలో నిర్మాతల మాస్టర్ ప్లాన్ ఏమిటి? అది కూడా “కబాలి” తరువాతి వారంలోనే విడుదల చేయడానికి సన్నద్ధమవ్వడంలో గల ఆంతర్యం ఏమిటి? అనేది దర్శకనిర్మాతలకే తెలియాలి. సినిమా ఎంత బాగా వచ్చినా.. ఆలిండియా సూపర్ స్టార్ గా కీర్తించబడే రాజనీకాంత్ సినిమాకి పోటీగా వెళ్ళడం అంటే “బాబు బంగారం” చాలా పెద్ద రిస్క్ చేస్తున్నట్లే లెక్క!