కలిసి నటించనున్న బాలకృష్ణ, కళ్యాణ్ రామ్.!

తెలుగు చిత్ర పరిశ్రమలో ప్రస్తుతం మల్టీ స్టారర్ సినిమాలు అధికంగా నిర్మితమవుతున్నాయి.  రామ్ చరణ్, ఎన్టీఆర్ తో రాజమౌళి  ఓ ఫ్యామిలీ డ్రామాని రూపొందించడానికి సన్నాహాలు చేస్తున్నారు. నాగార్జున, కార్తీ లతో ఊపిరి తీసి హిట్ అందుకున్న వంశీ పైడిపల్లి ఈ సారి మహేష్ బాబు, అల్లరి నరేష్ లను కలిపి సినిమా తీయబోతున్నారు. దువ్వాడ జగన్నాథం సినిమాతో హడావుడి చేసిన హరీష్ శంకర్ యువ హీరోలు నితిన్,  శర్వానంద్ లతో ఓ మూవీ చేసేందుకు రెడీ అవుతున్నారు. అలాగే అనిల్ రావిపూడి విక్టరీ వెంకటేష్, వరుణ్ తేజ్ లతో ఎఫ్2 మూవీ చేయనున్నారు.

భలే మంచి రోజు, శమంతకమణి చిత్రాలతో గుర్తింపు తెచ్చుకున్న  శ్రీరామ్ ఆదిత్య  మల్టీ స్టారర్ కథని రెడీ చేశారు. ఇందులో నాగార్జున, నాని నటిస్తున్నారు. ఇప్పుడు మరో మల్టీ స్టారర్ మూవీ కి కథ సిద్ధమవుతోంది. బాబాయ్ బాలకృష్ణతో కలిసి నటించడానికి కళ్యాణ్ రామ్ ఎప్పటి నుంచో ప్రయత్నిస్తున్నారు. కానీ కథ దొరకలేదు. రీసెంట్ గా పవన్ సాధినేని చెప్పిన లైన్ నచ్చడంతో కళ్యాణ్ రామ్ వెంటనే ఒకే చెప్పినట్టు సమాచారం. కల్యాణ్ రామ్ స్వయంగా నిర్మించనున్న ఈ సినిమా ప్రస్తుతం స్క్రిప్ట్ దశలో ఉంది. స్క్రిప్ట్ కొలిక్కి రాగానే అధికారికంగా ప్రకటించనున్నారు.