తెలుగు కళామతల్లి ముద్దుబిడ్డగా, తెలుగు పేద ప్రజల ఆరాధ్య దేవుడిగా, తెలుగు రాష్ట్ర రాజకీయాల్లో మార్పు తెచ్చిన వ్యక్తిగా నందమూరి తారకరామారావు కి మహా చరిత్ర ఉంది. అతని నిజ జీవితాన్ని వెండితెరపై చూసుకోవాలని ప్రతి తెలుగోడు ఎదురుచూస్తున్నాడు. తేజ దర్శకత్వంలో ఎన్టీఆర్ గా నందమూరి బాలకృష్ణ నటిస్తున్న ఈ సినిమా షూటింగ్ ఈరోజు మొదలయింది. రామకృష్ణ సినీ స్టూడియోలో వేసిన ప్రత్యేక సెట్ లో దుర్యోధనుడి పాత్రలో ఎన్టీఆర్ అద్భుతంగా నటించి మెప్పించిన దానవీర శూర కర్ణ సినిమాలోని “రాచరికమా అర్హతలు నిర్ణయించునది” అనే డైలాగ్ ను బాలకృష్ణ చెప్పడాన్ని తొలి షాట్గా చిత్రీకరించారు.
వెంకయ్య నాయుడు క్లాప్ కొట్టి సినిమా షూటింగ్ను ప్రారంభించారు. ముందుగా నిర్ణయించిన ముహూర్తం ప్రకారం 9 గంటల 42 నిమిషాలకు తొలి షాట్ను చిత్రీకరించారు. ఈ ప్రారంభోత్సవానికి దర్శకులు రాఘవేంద్ర రావు, బోయపాటి శ్రీను, వివి వినాయక్, పూరి జగన్నాథ్ లతో పాటు కళ్యాణ్ రామ్ కూడా పాల్గొన్నారు. ఎన్బీకే ఫిలింస్ బ్యానర్పై బాలకృష్ణ నిర్మిస్తున్న ఈ సినిమాకు సాయి కొర్రపాటి, విష్ణువర్థన్ ఇందూరిలు సహనిర్మాతలుగా వ్యవహరిస్తున్నారు. బాలీవుడ్ ఛాయగ్రాహకుడు సంతోష్ తుండియిల్ సినిమాటోగ్రఫి అందిస్తున్నారు. కీరవాణి సంగీతమందిస్తున్న సినిమాని దసరాకు రిలీజ్ చేయాలని చిత్ర యూనిట్ భావిస్తోంది.
