ప్రస్తుత తరం ప్రేమలను, ప్రేమికుల మనస్తత్వాలను కధాంశంగా విజయ్ ఆంటోనీ నిర్మించి, సంగీతం అందించి, ఎడిట్ కూడా చేసిన సినిమా “పూకీ”. తెలుగులో ఈ టైటిల్ బూతులా వినిపించడంతో “బూకీ” అని మార్చారు. కెమెరామెన్ గణేష్ చంద్ర దర్శకుడిగా పరిచయమవుతూ తెరకెక్కించిన ఈ చిత్రంలో అజయ్ -ధనుషా జంటగా నటించారు. గతవారం తమిళంలో విడుదలై ప్రేక్షకుల్ని ఆకట్టుకోలేకపోయిన ఈ చిత్రం తెలుగులో ఈవారం విడుదలైంది. మరి తెలుగు ప్రేక్షకుల్ని ఈ సినిమా ఏమేరకు అలరించగలిగిందో చూద్దాం..!!
కథ: ఆరేళ్లపాటు సీరియస్ రిలేషన్ లో ఉన్న కైలాష్ (అజయ్ దిశాన్) & ఆశా (ధనుషా) ఓ పెద్ద గొడవతో విడిపోతారు. ఎన్ని నెలలు గడుస్తున్నా.. మానసికంగా మాత్రం విడిపోలేకపోతారు.
ఈ బ్రేకప్ ని కైలాష్ & ఆశా ఎలా డీల్ చేశారు? మళ్లీ కలవడానికి అడ్డొచ్చిన వాళ్ల ఈగోలను ఎలా జయించారు? అనేది సినిమా కథాంశం.
నటీనటుల పనితీరు: అజయ్ దిశాన్ నటుడిగా ఇంకా పరిణితి చెందాల్సి ఉంది. సొంత డబ్బింగ్ చెప్పాలనుకోవడం మంచిదే అయినా.. మాటలో స్పష్టత ఉండడం ముఖ్యం. అజయ్ ఈ విషయాన్ని తన తదుపరి సినిమా విషయంలో దృష్టిలో పెట్టుకుంటే మంచిది.
ధనుషా క్యూట్ పెర్ఫార్మెన్స్ తో ఆకట్టుకునే ప్రయత్నం చేసింది. ఆమె రోల్ కూడా చాలా రిలేటబుల్ గా ఉంది. సునీల్, మంచు లక్ష్మీల పాత్రలు కథలో ఇరికించినబడినట్లుగా ఉన్నాయి.
విజయ్ ఆంటోనీ స్పెషల్ అపీరియన్స్ వల్ల సినిమాకి ఒరిగిందేమీ లేదు.
సాంకేతికవర్గం పనితీరు: రచయిత పుతియా పరిథి అందించిన కథను దర్శకుడు గణేష్ చంద్ర ఎందుకో పూర్తిగా అర్థం చేసుకోలేదు అనిపించింది. కామెడీ సీన్స్ వరకు పర్వాలేదు కానీ.. జెన్ జీ మైండ్ సెట్ ను ఆన్ స్క్రీన్ ప్రెజంట్ చేయడంలో మాత్రం విఫలమయ్యాడు. అందువల్ల.. ఎక్కడా కూడా వాళ్ల మైండ్ సెట్ ను సరిగా రీప్రెజంట్ చేయలేకపోయాడు. ప్రస్తుత సమాజంలో ఉన్న పలురకాల సెక్సువాలిటీలను పరిచయం చేసే సన్నివేశం, అమ్మాయి-అబ్బాయిలు మీటింగ్ సీన్స్ వరకు కొన్ని పేలాయి. అవి తప్ప సినిమాలో చెప్పుకోదగ్గ సందర్భాలు కానీ, ఎమోషన్స్ కానీ లేవు. ఫాదర్ సెంటిమెంట్ సీక్వెన్స్ కూడా సరిగా వర్కవుట్ అవ్వలేదు. ఓవరాల్ గా దర్శకుడిగా గణేష్ చంద్ర ఆకట్టుకోలేకపోయాడని చెప్పాలి.
విజయ్ ఆంటోనీ ఎడిటింగ్, సాంగ్స్ అస్సలు సింక్ అవ్వలేదు. ఈ సినిమా ప్యాటర్న్ కి కొత్త తరహా ఎడిట్ స్టైల్ & వీఎఫెక్స్ అవసరం. అవి సినిమాలో లోపించాయి. అలాగే.. ఒక్క పాట కూడా ఆకట్టుకోలేకపోయింది. తెలుగు వెర్షన్ వరకు యాడ్ చేసిన కొన్ని హీరోల వీడియోలు కాస్త కవ్వించాయి కానీ, అలరించలేకపోయాయి.
విశ్లేషణ: లవ్, జెన్ జీ ఐడియాలజీ, బ్రేకప్ అనేది కామన్ ఎమోషన్. దానికి భాషతో, ప్రాంతంతో సంబంధం లేదు. అలా వచ్చిన సినిమానే “ప్రేమలు, విత్ లవ్”. జనాలు హ్యాపీగా ఎంజాయ్ చేశారు ఆ సినిమాల్ని. అయితే.. “బూకీ”లో ఆ రిలేటబిలిటీ అని లోపించింది. ముఖ్యంగా.. తెలుగు డబ్బింగ్ మార్పులు కూడా ఆకట్టుకునేలా లేవు. అందువల్ల “బూకీ” అనేది మరో రొటీన్ లవ్ ఎంటర్టైనర్ గా మిగిలిపోయింది.
ఫోకస్ పాయింట్: జెన్ జీ లవ్ లో ఇంత ల్యాగ్ ఎందుకండీ!
రేటింగ్: 1.5/5
