Chiranjeevi: ఆయన చివరి ఆలోచనలు నాతో పంచుకున్నారేమో: చిరంజీవి భావోద్వేగం

తన మిత్రుడు, సీనియర్‌ నటుడు జీవీ నారాయణ రావు అంత్యక్రియలకు ప్రముఖ కథానాయకుడు చిరంజీవి హాజరయ్యారు. ఆయన పార్థివ దేహాన్ని సందర్శించి నివాళులర్పించిన చిరంజీవి.. కుటుంబ సభ్యులను ఓదార్చారు. ఈ క్రమంలో నారాయణ రావుతో తనకున్న అనుబంధాన్ని గుర్తుచేసుకున్నారు. సీనియర్‌ నటుడు నారాయణ రావు ఇటీవల కన్నుమూసిన విషయం తెలిసిందే. ఆయన అంత్యక్రియలు ఈ రోజు జరగనున్నాయి.

Chiranjeevi

నారాయణరావు గురించి చిరంజీవి మాట్లాడుతూ 1977 నుండి మా ఇద్దరి మధ్య పరిచయం ఉంది. అప్పట్లో ఫిల్మ్‌ ఇన్‌స్టిట్యూట్‌లో కలుసుకున్నాం. అప్పటికే నారాయణరావు సీనియర్‌ స్టూడెంట్. మేం శిక్షణలో ఉన్నప్పుడు తన అనుభవాలు పంచుకునేవాడు. ఆ సమయంలో బాగా క్లోజ్‌గా ఉండేవాళ్లం. ఆ తర్వాత సినిమా పరిశ్రమలో ఎవరికి వాళ్లం బిజీ అయ్యాం. నా సినిమాల్లోనూ నారాయణరావు నటించారు. ఆ తర్వాత మా బాధ్యతల వల్ల ఇద్దరి మధ్య గ్యాప్‌ వచ్చిందని చెప్పారు చిరంజీవి

పది రోజుల క్రితం ‘మంచుపల్లకి’ సినిమా చూశాను. అందులో నారాయణ రావు కీలకపాత్రలో నటించారు. ఆ సినిమా స్ఫూర్తితో కొత్త కంటెంట్‌, ఐదుగురు కొత్త వాళ్లతో ఒక స్టోరీ రాశానని కూడా చెప్పారు. నన్ను చూడాలని ఉందని చెప్పారు. దాని గురించి మాట్లాడిన తర్వాత ఇద్దరం కలసి ఓ ఫొటో కూడా దిగాం. బహుశా ఆయన చివరి ఆలోచనలు నాతో పంచుకున్నారేమో అనిపిస్తోంది. నారాయణ మొండి మనిషి. ఏ విషయాన్నీ లెక్క చేయడు అని తన జ్ఞాపకాలను గుర్తుచేసుకున్నారు చిరంజీవి.

1976లో కె.బాలచందర్ దర్శకత్వం వహించిన ‘అంతులేని కథ’ సినిమాతో ఇండస్ట్రీలోకి ఎంట్రీ ఇచ్చిన జీవీ నారాయణ రావు వందకు పైగా చిత్రాల్లో నటించారు. తొలి సినిమాకే ఉత్తమ సహాయ నటుడిగా నంది అవార్డు అందుకున్నారు. కృష్ట జిల్లా కురుమద్దాలిలో పుట్టిన ఆయన బాల్యం, విద్యాబ్యాసం గుంతకల్లులో సాగింది. ఎ.ఆర్.కృష్ణ వద్ద నటన, గిడుగు విశాలాక్షి వద్ద భరత నాట్యం, నటరాజ రామకృష్ణ వద్ద కూచిపూడి నృత్యం నేర్చుకున్నారు.

నారాయణ రావు చదువుకునే రోజుల్లో ‘మహమ్మద్ బీన్ తుగ్లక్’, ‘ప్రతాప రుద్రీయం’, ‘మంచు తెర’ తదితర నాటకాలలో ఆయన నటించి మెప్పించారు. దివంగత నటులు కోట శ్రీనివాసరావు, నూతన ప్రసాద్, దేవదాస్ కనకాల తదితరులు నారాయణరావుకు నాటకాలు వేసే రోజుల్లో మిత్రులు. నాటకాలతో కెరీర్‌ ప్రారంభించిన నారాయణ సినిమాలతో పాటు కొన్ని టీవీ సీరియళ్లలోనూ నటించారు. సినిమాల్లోకి వచ్చే ముందు మద్రాస్ ఫిలిం ఇన్‌స్టిట్యూట్‌లో శిక్షణ తీసుకున్న నారాయణరావు.. రజనీకాంత్, చిరంజీవికి మిత్రుడు.

‘అంతులేని కథ’, ‘ముత్యాల పల్లకి’, ‘అంగడి బొమ్మ’, ‘చిలకమ్మ చెప్పింది’, ‘గ్యాంగ్ లీడర్’, ‘హిట్లర్’ తదితర సినిమాల్లో నటించారు. ‘దేవాంతకుడు’, ‘ఇంటికో రుద్రమ్మ’, ‘యముడికి మొగుడు’, ‘పెళ్ళి నీకు శుభం నాకు’ సినిమాలను నిర్మించారు కూడా. నారాయణరావు మృతిపై మూవీ ఆర్టిస్ట్స్ అసోసియేషన్ (మా) సంతాపం తెలిపింది. నారాయణరావు తండ్రి ప్రసాదరావు కొంతకాలం డిస్ట్రిబ్యూటర్‌గా, సారథి స్టుడియోలో మేనేజింగ్ డైరెక్టర్‌గా చేశారు.

మొదటి వారానికే 390 శాతం రికవరీ.. ‘ఇరుముడి’ లాభాలు ఎంతో తెలుసా?