ఇంద్రగంటితో సినిమాకి సిద్ధం అంటున్న మహేష్, చిరు

“ఆష్టా చెమ్మ” మొదలుకొని మొన్న వచ్చిన “సమ్మోహనం” వరకూ ఇంద్రగంటి తీసిన ఏ సినిమా చూసినా సరే.. “ఈ సినిమాలో ఆ హీరో అయితే ఇరగాడేసేదిరా” అని అనుకోని ప్రేక్షకుడు ఉండడు. ఇదే విషయాన్ని ఇంద్రగంటి దగ్గర ప్రస్తావిస్తే.. హీరో ఇమేజ్ కి తగ్గట్లు నా కథలో మార్పులు చేయడం నాకు నచ్చదు, అందుకే నేను స్టార్ హీరోలతో సినిమాలు చేయడానికి మొగ్గుచూపను అని చెప్పిన సందర్భాలు కోకొల్లలు. అయితే.. ఇంద్రగంటి కాదనుకొన్నా స్టార్ హీరోలు ఆయన్ని వాదులుకోలేకపోతున్నారు. అందుకే ఆయన దర్శకత్వంలో నటించేందుకు ఆసక్తి కనబరుస్తున్నారు.

తాజా సమాచారం ప్రకారం ఇటీవల “సమ్మోహనం” సినిమా చూసిన మహేష్ బాబు దర్శకుడు ఇంద్రగంటి మోహనకృష్ణ పనితనానికి ఫిదా అయిపోయాడట, ముఖ్యంగా హీరోహీరోయిన్ల పాత్రలను ఆయన తెరకెక్కించిన విధానం మహేష్ కి విపరీతంగా నచ్చేసిందట. అందుకే మంచి కథ రెడీ చేయమని చెప్పాడట. అలాగే.. చిరంజీవి కూడా “సమ్మోహనం” చూశాక ఇంటికి పిలిచి మరీ టీం మొత్తాన్ని అభినందించడమే కాకుండా ఇంద్రగంటిని తన కోసం ఒక కథ రాయమని చెప్పినట్లు సమాచారం. చూస్తుంటే.. “సమ్మోహనం”తో ఇంద్రగంటి ప్రేక్షకులకంటే ఎక్కువగా స్టార్ హీరోలను సమ్మోహనపరిచినట్లున్నాడు.