కాస్ట్యూమ్ డిజైనర్ గా మెగా డాటర్

టాలీవుడ్ సినీ సెలబ్రిటీల కుటుంబంలోని మహిళలు వంటింటికే పరిమితం కావాలనుకోవడంలేదు. అలాగని డైరక్టర్ భార్యగా, హీరో కూతురిగా పిలిపించుకోవడానికి ఇష్టపడడంలేదు. తమకంటూ ఒక పేరుండాలని భావిస్తున్నారు. కాస్ట్యూమ్  డిజైనర్లుగా మారి.. సరికొత్త దుస్తులను ఆవిష్కరిస్తున్నారు. హీరోలకు, హీరోయిన్లకు డ్రస్సులను డిజైన్ చేసి సినిమా విజయంలో భాగం అవుతున్నారు. జక్కన్న ఎస్.ఎస్. రాజమౌళి సతీమణి రమా రాజమౌళి,  దర్శకుడు శ్రీనువైట్ల అర్ధాంగి రూప వైట్ల, రచయిత కోన వెంకట్ సోదరి నీరజ కోన కాస్ట్యూమ్ డిజైనర్లుగా తమ ప్రతిభను నిరూపించుకున్నారు. వీరి బాటలో మెగాస్టార్ చిరంజీవి పెద్దకుమార్తె సుస్మిత అడుగులు వేస్తోంది.

తండ్రి 150 వ సినిమాకు ఈమె కాస్ట్యూమ్ డిజైనర్ బాధ్యతను తీసుకుంది. గతంలోనూ మెగా డాటర్ శంకర్ దాదా ఎంబీబీఎస్ చిత్రానికి దుస్తులను డిజైన్ చేసి అభినందనలు అందుకుంది. ఇప్పుడు మళ్లీ  ప్రతిష్టాత్మక చిత్రానికి కాస్ట్యూమ్ డిజైనర్ గా చేస్తోంది. కత్తి లాంటోడు చిత్రం షూటింగ్ ప్రారంభమైన రోజు మెగాస్టార్  హ్యాండ్సమ్ గా కనబడడం వెనుక సుస్మిత కృషి ఉందని తెలుస్తోంది. ఆమె టాలెంట్ ను మరోసారి త్వరలోనే తెరపైన చూడనున్నాం.