రౌడీ మరో హిట్టు కొట్టేలా ఉన్నాడుగా..!

సెన్సేషనల్ స్టార్ విజయ్ దేవరకొండ హీరోగా నటిస్తున్న తాజా చిత్రం ‘డియర్ కామ్రేడ్’. ‘మైత్రీ మూవీ మేక‌ర్స్’ ‘బిగ్ బెన్ సినిమాస్’ బ్యానర్ల పై న‌వీన్ ఎర్నేని, య‌ల‌మంచిలి ర‌విశంక‌ర్‌, సి.వి.ఎం(మోహ‌న్‌), య‌శ్ రంగినేని కలిసి ఈ చిత్రాన్ని నిర్మిస్తున్నారు. రష్మిక మందన హీరోయిన్ గా నటిస్తున్న ఈ చిత్రాన్ని భరత్ కమ్మ డైరెక్ట్ చేస్తున్నాడు. ఇప్పటికే విడుదలైన టీజర్… ఈ చిత్రం పై అంచనాల్ని పెంచేసింది. జస్టిన్ ప్రభాకరన్ సంగీతం అందించిన పాటలకు కూడా మంచి రెస్పాన్స్ వచ్చింది. నిజానికి మే 31 నే విడుదల కావలసిన ‘డియర్ కామ్రేడ్’.. పోస్ట్ ప్రొడక్షన్ పనులు పూర్తికాకపోవడంతో జూలై 26కి పోస్ట్ పోన్ చేసారు. తెలుగు, తమిళ, కన్నడ భాషల్లో ఈ చిత్రాన్ని ఏకకాలంలో విడుదల చేయబోతున్నారు. ఇక విడుదల సమయం దగ్గర పడుతుండడంతో ప్రమోషన్లను మొదలు పెట్టారు. ఇందులో భాగంగా ఈరోజు ట్రైలర్ ను విడుదల చేసారు చిత్ర యూనిట్ సభ్యులు.

.

‘ఒక కామ్రేడ్ పోరాడితే అతనికి ఆ పోరాటం హాయినివ్వాలి… స్వేచ్ఛనివ్వాలి.. నిన్ను చూస్తే అలా లేవు’ అంటూ సాగే డైలాగ్ తో టీజర్ మొదలైంది. ఈ ట్రైలర్ లో మూడు రకాల లుక్స్ తో విజయ్ కనిపిస్తున్నాడు. ముందునుండీ ప్రచారం జరుగుతున్నట్టే… హీరోయిన్ రష్మిక ఈ చిత్రంలో క్రికెటర్ గా కనిపిస్తుంది. హీరో, హీరోయిన్ల లిప్ లాక్ లు.. రొమాంటిక్ సీన్లు ఆకట్టుకుంటాయి. స్టూడెంట్ లీడర్ గా విజయ్ కనిపిస్తున్నాడు. కాస్త ‘అర్జున్ రెడ్డి’ తరహాలోనే 3 నిముషాలు ఉంది ఈ ట్రైలర్. ఆ సినిమా ఛాయలు కూడా అక్కడక్కడా కనిపిస్తున్నాయి. ‘అర్జున్ రెడ్డి’ లానే కోపిష్టిగా హీరో విజయ్ కనిపిస్తున్నాడు.డైలాగ్స్ చాలా బాగున్నాయి. ‘నన్ను భయపెడుతున్నారనుకుంటున్నారేమో… మీరే భయపడుతున్నారు… కనిపిస్తుంది’ అని విజయ్ ట్రైలర్ చివర్లో చెప్పే డైలాగ్ హైలెట్ అని చెప్పాలి. ట్రైలర్ బాగుంది. కచ్చితంగా మన రౌడీ మరో హిట్టు కొట్టేలా ఉన్నాడు.