‘బొమ్మరిల్లు’ కాంబో రిపీట్ కానుందా..?

ఒకప్పుడు టాలీవుడ్ లో వరుస సినిమాలు చేసి టాప్ హీరోగా గుర్తింపు తెచ్చుకున్నాడు సిద్ధార్థ్. అతడు నటించిన ‘బొమ్మరిల్లు’, ‘నువ్వొస్తానంటే నేనొద్దంటానా’ లాంటి సినిమాలు యూత్ ని కట్టిపడేశాయి. అమ్మాయిల్లో సిద్ధార్థ్ కి మంచి క్రేజ్ ఉండేది. కానీ ఆ తరువాత అతడికి అవకాశాలు తగ్గాయి. దీంతో కోలీవుడ్ కి వెళ్లి అక్కడ సినిమాలు తీయడం మొదలుపెట్టాడు. కొన్నాళ్లక్రితం సిద్ధార్థ్ నటించిన హారర్ థ్రిల్లర్ ‘గృహం’ సినిమా ప్రేక్షకుల ముందుకొచ్చి మంచి సక్సెస్ అందుకుంది. ఇంతకాలానికి అతడు తెలుగు స్ట్రెయిట్ ఫిల్మ్ లో నటించబోతున్నాడు. అదే ‘మహాసముద్రం’.

‘ఆర్ఎక్స్ 100’ ఫేమ్ అజయ్ భూపతి డైరెక్ట్ చేస్తోన్న ఈ సినిమాలో శర్వానంద్ కూడా నటిస్తున్నాడు. తాజాగా సిద్ధార్థ్ మరో క్రేజీ ప్రాజెక్ట్ లైన్లో పెట్టినట్లు సమాచారం. ‘ఉయ్యాలా జంపాల’ సినిమాతో దర్శకుడిగా ఎంట్రీ ఇచ్చిన విరించి వర్మ ఆ తరువాత నాని హీరోగా ‘మజ్ను’ సినిమా తీశాడు. ఈ సినిమా వచ్చి నాలుగేళ్లు గడుస్తున్నా.. మరో సినిమాను అనౌన్స్ చేయలేదు ఈ డైరెక్టర్.

రీసెంట్ గా ఈ డైరెక్టర్ సిద్ధార్థ్ ని కలిసి కథ వినిపించినట్లు తెలుస్తోంది. కథ నచ్చడంతో సిద్ధార్థ్ గ్రీన్ సిగ్నల్ ఇచ్చారట. ప్రముఖ నిర్మాత దిల్ రాజు ఈ సినిమాను నిర్మిస్తారని టాక్. గతంలో సిద్ధార్థ్, దిల్ రాజుల కాంబినేషన్ లో ‘బొమ్మరిల్లు’ సినిమా వచ్చింది. ఇప్పుడు మరోసారి ఈ క్రేజీ కాంబో సెట్స్ పైకి వెళ్లబోతుందని వార్తలు వస్తున్నాయి. మరి ఈ సినిమాపై అధికార ప్రకటన వస్తుందేమో చూడాలి!