సస్పెన్స్ థ్రిల్లర్ గా రూపొందిన ‘వి’ చిత్రం కోసం ప్రేక్షకులు ఎంతో ఆసక్తితో ఎదురుచూస్తున్నారు. ఇంద్రగంటి మోహన్ కృష్ణ డైరెక్షన్లో తెరకెక్కిన ఈ చిత్రాన్ని సక్సెస్ ఫుల్ ప్రొడ్యూసర్ దిల్ రాజు నిర్మించాడు. నిజానికి ఈ చిత్రం.. ‘పవన్, మహేష్ ల మల్టీ స్టారర్ గా రూపొందాల్సింది’ అంటూ సుధీర్ బాబు ఓ ఇంటర్వ్యూలో చెప్పుకొచ్చాడు. అప్పటి నుండీ ‘టాలీవుడ్లో ఓ భారీ మల్టీ స్టారర్ మిస్ అయిపోయింది’ అనే ఫీలింగ్ అందరిలోనూ నెలకొంది.
తాజాగా ఆ విషయం పై ‘వి’ చిత్రం దర్శకుడు ఇంద్రగంటి మోహన్ కృష్ణ క్లారిటీ ఇచ్చాడు. ఆయన మాట్లాడుతూ.. “మనం ఏ సినిమా చూసినా… ఇది వేరే హీరోలతో చేస్తే ఇంకా బాగుండేది కదా అని అనుకుంటూ ఉంటాం. ఎన్టీఆర్, శోభన్ బాబుతో ఈ సినిమా చేస్తే ఎలా ఉంటుంది అలాగే హాలీవుడ్ స్టార్స్ తో చేస్తే ఎలా ఉంటుందనే ఆలోచనలు రావడం సహజం. అలాగే ‘వి’ సినిమా కూడా ఇద్దరు పెద్ద స్టార్ హీరోలు అయిన మహేష్, పవన్ లతో చేస్తే అద్భుతంగా ఉంటుంది అని అనుకున్నాం అది కూడా జస్ట్ సరదాగా.!
అంతేకాని పవన్, మహేష్ లను దృష్టిలో పెట్టుకునే నేను ఈ చిత్రం కథను రెడీ చేసుకోలేదు. నా దృష్టిలో ఈ చిత్రానికి నాని, సుధీర్ బాబు మాత్రమే న్యాయం చెయ్యగలరు అనిపిస్తుంది. ఎంతో ఎఫర్ట్ పెట్టి వాళ్ళు కూడా ఈ సినిమా చేసారు” అంటూ చెప్పుకొచ్చాడు దర్శకుడు ఇంద్రగంటి మోహన్ కృష్ణ.
