లైంగిక వేధింపుల ఆరోపణలు.. ప్రముఖ దర్శకుడు అరెస్ట్‌

మలయాళ సినిమా పరిశ్రమలో కొన్ని ఏళ్ల క్రితం లైంగిక వేధింపుల ఆరోపణలు వచ్చిన విషయం తెలిసిందే. ఆ ఎఫెక్ట్‌తో మలయాళ సినిమా తారల అసోసియేషన్‌లో పెద్ద ముసలమే పుట్టుకొచ్చింది. మొత్తం కార్యవర్గం దిగిపోయి మళ్లీ ఎన్నికలకు వెళ్లి ఇప్పుడు కొత్త నాయకులు మలయాళ సినిమా పరిశ్రమ నటుల సంఘాన్ని హ్యాండిల్‌ చేస్తున్నారు. అయితే రీసెంట్‌ టైమ్స్‌లో ఈ వ్యవహారం సద్దుమణిగినట్లే అనిపించింది. ఎక్కడా ఎవరూ మాట్లాడుకపోవడంతో ఇక సమసి ముగిసినట్లే అనుకున్నారు. కానీ ఇప్పుడు ఏకంగా ఓ దర్శకుడి అరెస్టు జరిగింది.

Ranjith Balakrishnan

దీంతో మలయాళ సినిమా పరిశ్రమలో మళ్లీ ఏం జరుగుతోంది అనే చర్చ మొదలైంది. ప్రముఖ మలయాళ దర్శకుడు రంజిత్‌ బాలకృష్ణన్‌ను కొచ్చి పోలీసులు అరెస్ట్ చేశారు. లైంగిక వేధింపుల ఆరోపణలపై ఆయన్ను అరెస్టు చేసినట్లు పోలీసులు తెలిపారు. ఒక యువ నటి ఇచ్చిన ఫిర్యాదు మేరకు ఎర్నాకుళం సెంట్రల్ పోలీసులు రంజిత్‌ బాలకృష్ణన్‌ను అరెస్ట్‌ చేశామని తెలిపారు. ఇటీవల ఓ సినిమా సెట్‌లో రంజిత్ తనతో అనుచితంగా ప్రవర్తించారని ఆ నటి ఫిర్యాదు చేసింది. ఇప్పుడు ప్రాథమిక విచారణ కోసం దర్శకుడిని కొచ్చికి తరలించారు.

పోలీసులను ఆశ్రయించడానికి ముందు బాధితురాలు సినిమా యూనిట్‌లోని అంతర్గత ఫిర్యాదుల కమిటీకి ఫిర్యాదు చేసింది. ఆ కమిటీ సభ్యులు ఫిర్యాదును పరిశీలించి తీవ్రమైన అంశంగా గుర్తించారు. దీంతో తదుపరి చర్యల కోసం కేసును కేరళ పోలీసులకు ఈ కేసును బదిలీ చేశారు. మలయాళ సినిమా పరిశ్రమ గురించి తేల్చడాని గతంలో జస్టిస్‌ హేమ కమిటీ ఏర్పాటు చేసిన విషయం తెలిసిందే. అప్పటి నుండి ఇలాంటి విషయాలు తరచూ బయటపడుతున్నాయి.

ఇదిలా ఉండగా గతంలోనూ రంజిత్‌పై లైంగిక వేధింపుల ఆరోపణలు వచ్చాయి. 2024లో ఓ బెంగాలీ నటి చేసిన ఆరోపణల వల్ల కేరళ చలనచిత్ర అకాడమీ ఛైర్మన్ పదవికి ఆయన రాజీనామా చేయాల్సి వచ్చింది. అప్పట్లో ఆ ఆరోపణలను రంజిత్ తోసిపుచ్చారు. అయితే ఇప్పుడు మరో నటి ఫిర్యాదు చేయడంతో ఆయన చుట్టూ ఉచ్చు బిగిసినట్లయింది. మరి ఈ ఘటనలు ఎక్కడికి దారితీస్తాయో చూడాలి.

 తెలుగు నిర్మాతలు మలయాళంలో సినిమాలు చేసుకుంటే బెటరా..హాట్ టాపిక్ అయిన బన్నీ వాస్ కామెంట్స్