ఈ సంవత్సరం విడుదలైన తెలుగు సినిమాల్లో మీకు నచ్చిన సినిమా ఏమిటంటే దాదాపు అందరూ బాహుబలి కంక్లూజన్ అని సమాధానమిస్తారు. అటువంటి కళాఖండాన్ని తెరకెక్కించిన రాజమౌళిని ఇదే ప్రశ్న అడిగితే ఆయన యేమని సమాధానం ఇస్తారు? ఇంట్రెస్టింగ్ గా ఉంది కదూ.. అందుకే జక్కన్నను ఓ ఇంటర్వ్యూ లో ఇదే ప్రశ్నను అడిగారు. అందుకు ఆయన ఎటువంటి ఈగోలకు పోకుండా మనసులోని మాటను బయటపెట్టారు. “నాకు అర్జున్ రెడ్డి బాగా నచ్చింది. అందరూ బాగా కష్టపడ్డారు. కొత్త ఫీల్ ని అందించారు” అని చెప్పారు. నూతన దర్శకుడు సందీప్ వంగ తెరకెక్కించిన ఈ సినిమా ఆగస్టు లో రిలీజ్ అయి సంచలన విజయం సాధించింది.
అనేక విమర్శలను ఎదుర్కుంటూ కలక్షన్ల వర్షం కురిపించింది. తెలుగు సినిమా పరిధులను విస్తరించింది. టాలీవుడ్ కి కొత్త బాటలు పరిచింది. ఇందులో అర్జున్ రెడ్డి గా నటించిన విజయ్ దేవేరకొండ తో పాటు షాలిని పాండే, రాహుల్ రామకృష్ణ తదితరులు అద్భుత నటన ప్రదర్శించారు. నిర్మాత ప్రణయ్ వంగ కి లాభాలను అందించారు. ఈ సినిమా రిలీజ్ అయినప్పుడే రామ్ గోపాల్ వర్మ చిత్ర బృందాన్ని అభినందించారు. మహేష్ బాబు, మంత్రి కేటీఆర్ తదితరులు ప్రశంసించారు. ఇప్పుడు రాజమౌళి ప్రత్యేకంగా చెప్పడంతో అర్జున్ రెడ్డి చిత్ర బృందం ఆనందపడుతోంది. ఆయన మాట ఒక అవార్డు అని కృతజ్ఞతలు తెలిపింది.
