Double XL: బాలీవుడ్‌లో మరో వెరైటీ సినిమా.. చూశారా?

September 23, 2022 / 11:50 AM ISTByFilmy Focus

Join Us

Double XL: బాలీవుడ్‌లో మరో వెరైటీ సినిమా.. చూశారా?

బాలీవుడ్‌లో కాన్సెప్ట్‌ బేస్డ్‌ సినిమాలు చాలానే వస్తుంటాయి. అంతేకాదు వాటిలో చాలావరకు విజయాల శాతం కూడా బాగుంటుంది. అయితే ఇటీవల కాలంలో బాలీవుడ్‌ పరిస్థితి ఏం బాగోలేదు. ఏది ముట్టుకున్నా మట్టే అయిపోతోంది. సినిమా ఇలా రావడం, అలా వెళ్లిపోవడం జరిగిపోతుంది. ఈ సమయంలో బాలీవుడ్‌లో మరో కాన్సెప్ట్‌ బేస్డ్‌ సినిమా రాబోతోంది. అదే ‘డబుల్‌ ఎక్స్‌ఎల్‌’. సోనాక్షీ సిన్హా, హ్యూమా ఖురేసీ ముఖ్య పాత్రధారులు. సతరమ్‌ రమానీ దర్శకత్వం వహించిన ఈ చిత్రాన్ని అక్టోబరు 14న ప్రేక్షకుల ముందుకు తీసుకురానున్నారు.

నాజూగ్గా ఉంటేనే అందం కాదు, బొద్దుగా ఉన్నా అందమే అంటుంటారు. ఈ మాటలు వినడానికి ఓకే కానీ.. నిజ జీవితంలో మాత్రం కష్టమే. ఇలా బొద్దుగుమ్మలు చాలా మంది సమాజంలో మాటలు పడి ఆందోళన చెందుతుంటారు. అలాంటి లావుగా ఉండే మహిళలు ఎదుర్కొంటున్న సమస్యల నేపథ్యంలో వినోదాత్మకంగా సాగే చిత్రమిది. ఈ సినిమా ట్రైలర్‌ను చిత్రబృందం తాజాగా విడుదల చేసింది. ఈ సినిమాను మన దేశంతో పాటు బ్రిటన్‌లో చిత్రీకరించారట.

ఉత్తర్‌ ప్రదేశ్‌లోని ఓ ప్రాంతం నుండి ఢిల్లీ వచ్చిన ఇద్దరు అమ్మాయిలు.. తన బొద్దు శరీరంతో ఎలాంటి సమస్య పడింది అనేది సినిమాలో చూపిస్తారు. ఈ సినిమా కోసం సోనాక్షీ, హ్యూమా తమ శరీరాకృతిని మార్చుకున్నారు. దీని కోసం బరువు పెరిగి, తమను తాము పాత్రల కోసం సిద్ధం చేసుకున్నారట. ఈ సినిమాలో జహీర్‌ ఇక్బాల్‌, మహత్‌ రాఘవేంద్ర తదితరులు కూడా ప్రధాన పాత్రధారులు. మరి జోరు లేని బాలీవుడ్‌ను ఈ డబుల్‌ ఎక్స్‌ఎల్‌ భామలు ఎంతవరకు ముందుకు లాగుతారు అనేది చూడాలి.

ట్రైలర్‌ అయితే ప్రామిసింగ్‌గా ఉన్నప్పటికీ బాలీవుడ్‌ జనాల మైండ్‌సెట్‌ ఇంకా అర్థం కావడం లేదు. దీంతో దేనికి విజయం దక్కుతుంది అనేది తెలియడం లేదు. అలాగే సోనాక్షీ సిన్హాకు కానీ, హ్యూమా ఖురేషీకి కానీ ఇటీవల కాలంలో సరైన విజయాలు లేవు. దీంతో వారికి కూడా ఈ సినిమా విజయం చాలా అవసరం.