నిన్నటినుంచి రాజశేఖర్ నటించిన తాజా చిత్రం “అర్జున” అని కొన్ని పోస్టర్స్ మరియు టీజర్ హల్ చల్ చేస్తున్న విషయాన్ని అందరు గమనించే ఉంటారు. సి.కళ్యాణ్ నిర్మాణ సారధ్యంలో కన్మణి దర్శకత్వంలో రూపొందిన ఈ చిత్రం మార్చి 15న విడుదలవుతోంది. రాజకీయాల నేపధ్యంలో తెరకెక్కిన ఈ చిత్రం అసలు ఎప్పుడు మొదలైంది? ఇప్పుడు ఎందుకు రిలీజ్ అవుతుంది అనే విషయం ఎవ్వరికీ తెలియదు. కనీసం సినిమాలో కథానాయకుడిగా నటించడమే కాక ద్విపాత్రాభినయం పోషించిన రాజశేఖర్ కి అయినా ఈ సినిమా వచ్చే వారం విడుదలవుతుందనే విషయం తెలుసో లేదో.
ఇంతకీ ఈ సినిమా దాదాపు ఆరేళ్ళ క్రితం తెరకెక్కిందట. అప్పట్లో అప్పులు కట్టకపోవడంతో ల్యాబ్ లోనే మిగిలిపోయిన ఈ చిత్రాన్ని ఇన్నాళ్లకు ఆంధ్రాలో ఎన్నికల వేడి రాజుకుంటున్న తరుణంలో విడుదల చేస్తున్నారు. సినిమాలోని కొన్ని సన్నివేశాలు ప్రస్తుత రాజకీయ ధోరణికి అద్దం పట్టేలా ఉండడంతో సి.కళ్యాణ్ ఈ చిత్రాన్ని ఇప్పుడు విడుదల చేస్తున్నారు. మరి ఈ సినిమా ఎలా ఉంటుంది అనేది తెలియాలంటే మార్చి 15 వరకూ వెయిట్ చేయాల్సిందే.
