నా కెరీర్ కి జరిగిన మంచి-చెడు ‘హలో’

హీరోయిన్స్ కి లాంచ్ ప్యాడ్ అనేది చాలా ఇంపార్టెంట్. సరైన ప్రొజెక్ట్ తో ఎంట్రీ ఇస్తే సదరు భామ వెనుక మన సౌత్ సినిమా దర్శకనిర్మాతలు క్యూ కడతారు. అదే అమ్మడు ఇండస్ట్రీ బ్యాక్ డ్రాప్ ఉంటే గనుక ఆ ఆఫర్ల వెల్లువ ఇంకాస్త ఎక్కువగా ఉంటుంది. ఇప్పుడు ఆ తరహాలో తెలుగు తెరకు పరిచయమవుతున్న కథానాయకి కళ్యాణ్ ప్రియదర్శన్. ప్రముఖ మలయాళ దర్శకుడు ప్రియదర్శన్ కుమార్తె అయిన కళ్యాణి “హలో” సినిమాతో అఖిల్ సరసన కథానాయికగా నటిస్తోంది. విక్రమ్ కుమార్ దర్శకత్వంలో నాగార్జున నిర్మిస్తున్న ఈ చిత్రం ప్రీరిలీజ్ ఈవెంట్ నిన్న సాయంత్రం వైజాగ్ లో జరిగింది. ఈ వేడుకలో అఖిల్ పాట, అఖిల్-కళ్యాణి కలిసి ఆడిన ఆట ఆహుతులను అమితంగా ఆకట్టుకొని ఈవెంట్ కి హైలైట్ గా నిలిచాయి.

అయితే.. ఈ సందర్భంగా కళ్యాణి మాట్లాడిన మాటలు మాత్రం చర్చనీయాంశమయ్యాయి. “నేను తెలుగులో నాగార్జున గారి ప్రొడక్షన్ లో వస్తున్న సినిమా ద్వారా పరిచయమవ్వడం నాకు అదృష్టం మాత్రమే కాదు దురదృష్టం కూడా, ఎందుకంటే నిర్మాతగా ఆయన ఒక స్టాండర్డ్ ని క్రియేట్ చేసేస్తారు, మిగతా సినిమాల్లో నటిస్తున్నప్పుడు ఆ ఫీల్ ఉండదు. అందువల్ల నాకు ఈ అదృష్టం కమ్ దురదృష్టం” అంటూ కామెంట్ చేసింది కళ్యాణి. ఈ మాటలకి నాగార్జున కూడా ఒక్క నిమిషం షాక్ అయ్యాడు. అమ్మడి తెలివి చూస్తుంటే.. తెలుగులోనే కాదు సౌత్ ఇండియన్ లాంగ్వేజస్ అన్నిట్లో వరుస సినిమాలు చేసేలా ఉంది.