గోపి అతడిని సిద్ధం కమ్మన్నాడట..!

హీరోగా చేసిన తొలి ప్రయత్నం ఫలించక విలన్ గా మారిన గోపీచంద్ కి ‘యజ్ఞం’ సినిమా మళ్ళీ హీరోగా నిలబెడితే పరిశ్రమలో ఇతగాడు పక్కా హీరో మెటీరియల్ అని నమ్మేలా చేసిన చిత్రం ‘ఆంధ్రుడు’. పరచూరి మురళి దర్శకత్వం వహించిన ఈ సినిమాతో గోపి హిట్ ట్రాక్ ఎక్కితే మురళికి ఇదే చివరి హిట్ సినిమాగా మిగిలిపోయింది. కొన్నాళ్లుగా గోపీచంద్-మురళీ కలయికలో మరో సినిమా వస్తుందన్న ప్రచారం జరుగుతోన్న విషయం తెలిసిందే. ఇప్పుడు ఆ సినిమా సెట్స్ పైకి వెళ్లేందుకు రంగ సిద్ధమవుతుందట.

నితిన్ తో చేసిన ‘రెచ్చిపో’, బాలకృష్ణ హీరోగా వచ్చిన ‘అధినాయకుడు’ మురళికి హిట్ ఇవ్వలేకపోయాయి. దాంతో హిట్ కొట్టాలనే కసితో గోపీచంద్ హీరోగా ఓ కథ సిద్ధం చేసిన మురళీ ఆ కథను గోపీకి వినిపించగా అతడు గ్రీన్ సిగ్నల్ ఇచ్చాడట. అయితే ‘ఆక్సిజన్’, సంపత్ నంది సినిమాలతో బిజీ అయిపోవడంతో ఆ సినిమా ఎప్పుడు మొదలయ్యేదన్నది అనుమానంగా మారింది. పైగా మధ్యలో ఎప్పుడో ఆగిపోయిన బి.గోపాల్ సినిమా వచ్చి చేరింది. ఇప్పుడు రెండు సినిమాలు పూర్తి చేసిన గోపీచంద్ సంపత్ నంది సినిమాని జనవరి నాటికి పూర్తి చేయనున్నాడట. ఆ సినిమాకి గుమ్మడికాయ కొట్టగానే మురళీతో సినిమా మొదలెట్టనున్నాడు గోపీచంద్. ఈ మేరకు ఆ దర్శకుడికి కబురంపాడట. గోపీచంద్ తో సినిమా చేసే సన్నాహాల్లో ఉన్న కేకే రాధామోహన్ ఈ సినిమాని నిర్మించనున్నట్టు సమాచారం.