Gopichand: పాత నానుడికి మసాలా యాడ్‌ చేశారు… గోపీచంద్‌ కొత్త లుక్‌ చూశారా?

మాచో స్టార్‌ గోపీచంద్‌ (Gopichand) సినిమా అంటే ఫ్యామిలీ ఓరియెంటెడ్‌ వినోదాత్మక చిత్రం అని ఓ లెక్క ఉంది. అలాగే దర్శకుడు శ్రీను వైట్ల అంటే ఓ కామెడీ ఎంటర్‌టైనర్‌ తీస్తారనే అంచనా ఉంది. మరి ఇలాంటి ఇద్దరూ కలసి చేస్తున్న సినిమా అంటే ఎలా ఉంటుందో ఓ అంచనా ఉంటుంది. అయితే ఇప్పుడు ఆ సినిమా నుండి వచ్చిన టీజర్‌ చూస్తే… ఆ అంచనాలు తారుమారు అయ్యాయి. పూర్తి స్థాయి యాక్షన్‌ సినిమాను శ్రీను వైట్ల (Srinu Vaitla) సిద్ధం చేసినట్లు కనిపిస్తోంది.

వేణు దోనేపూడి నిర్మాతగా మొదలైన ఓ సినిమాకు వివిధ కారణాల వల్ల బ్రేకులు పడ్డాయి. ఆ తర్వాత ఇక సినిమా ఉండదేమో అనుకుంటుండగా పీపుల్‌ మీడియా ఫ్యాక్టరీ ఆ సినిమాలో భాగమైంది. ఈ నేపథ్యంలో సినిమాకు ‘విశ్వం’ అనే పేరును ఖరారు చేస్తూ ఓ వీడియోను రిలీజ్‌ చేశారు. ఇంట్రస్టింగ్‌గా ఉన్న ఆ వీడియో ఇప్పుడు వైరల్‌గా మారింది. పేరులో మరోసారి గోపీచంద్ చివర పూర్ణం (o) సెంటిమెంట్‌ను కొనసాగించడం విశేషం.

ఘనంగా జరుగుతున్న ఓ వివాహ వేడుకకు గోపీచంద్‌ ఓ పెద్ద గిటార్‌ బ్యాగ్‌ భుజానికి తగిలించుకొని వస్తాడు. గిటారు వాగించి శ్రవణానందం కలిగిస్తాడేమో అనుకుంటే… ఆ బ్యాగ్‌లో నుండి పెద్ద మెషిన్‌ గన్‌ బయటకు తీసి వధూవరులతో పాటు అతిథులందర్నీ కాల్చి చంపేస్తాడు. ఆ తరవాత ఆ పెళ్లి వేడుక కోసం సిద్ధం చేసిన బిర్యానీని రుచి చూస్తాడు. ఆ తర్వాత చెప్పిన డైలాగ్‌ కూడా కొత్తగా అనిపించింది.

‘‘ప్రతి గింజ మీద తినేవాడి పేరు రాసి ఉంటుందంటారు. దీనిపై నా పేరు రాసుకున్నాను’’ అంటూ బిర్యానీ మెతుకు పట్టుకుని గోపీచంద్‌ డైలాగ్‌ చెబుతాడు. ‘‘తెగి పడటం, తెగించగలడం, ప్రమాణ ఫలితం, విఘాత విశ్వం, నిలబడటం, నియంతలగుటం, నిరంతర రణం, తదైవ విశ్వం’’ అంటూ బ్యాగ్రౌండ్‌లో ఓ పాట కూడా వినిపిస్తోంది. ఇదంతా చూస్తుంటే గోపీచంద్‌ మునుపెన్నడూ చేయని పాత్ర ఈ సినిమాలో పోషిస్తున్నట్లు అర్థమవుతోంది.