‘ఆర్‌ఆర్‌ఆర్‌’, ‘కేజీయఫ్‌’కి నై.. ‘సర్కారు’కి సై

సినిమా ప్రచారంలో ట్విటర్‌ పాత్ర ఇప్పుడు చాలా పెరిగిపోయింది. ట్రోలింగ్‌ జరగాలన్నా, ప్రచారం జరగాలన్నా, ఉన్నది లేనట్లు భ్రమించేలా చేయాలన్నా ట్విటర్‌కే. అంతగా సినిమా ప్రచారంలో ట్విటర్‌ కీలకంగా మారిపోయింది. ట్విటర్‌ ప్రచారంలో పర్సనలైజ్డ్‌ ఎమోజీ ఒకటి. సినిమాకి సంబంధించి హ్యాష్‌ట్యాగ్‌ను టైప్‌ చేసినప్పుడు పక్కన ఆ హీరో బొమ్మ, లోగో, ఐకాన్‌ ఇలా ఏదో ఒకటి యాడ్‌ చేస్తుంటారు. ‘సర్కారు వారి పాట’ సినిమాకు తాజాగా ఈ అవకాశం దక్కింది. అయితే ఇక్కడో విషయం మనం గమనించొచ్చు. అది ఆసక్తికరం కూడా.

ఇటీవల కాలంలో సౌత్‌ నుండి వచ్చిన పాన్‌ ఇండియా సినిమాలు ‘ఆర్ఆర్‌ఆర్‌’, ‘కేజీయఫ్‌ 2’కి ట్విటర్‌లో ప్రచారం భారీగానే సాగింది. అయితే వారికి ట్విటర్‌లో పర్సనల్‌ ఎమోజీ అయితే రాలేదు. ‘ఆర్‌ఆర్‌ఆర్‌’ సినిమాకు సంబంధించి ఎన్ని రకాల ప్రమోషన్స్ చేయాలో అన్నీ చేసి రాజమౌళి టీమ్‌ అదరగొట్టింది. ‘కేజీయఫ్‌ 2’కి సంబంధించి కూడా ప్రశాంత్‌ నీల్‌ భారీ స్థాయిలో ప్రమోషన్స్‌ చేశారు కానీ వాళ్లు కూడా ఎమోజీ తీసుకురాలేకపోయారు. కానీ ‘సర్కారు వారి పాట’ టీమ్‌ చేసింది.

ఇటీవల కాలంలో సౌత్‌ నుండి వచ్చిన సినిమాల్లో ఇలా ట్విటర్‌ ఎమోజీ తీసుకొచ్చిన సినిమా అంటే ‘బీస్ట్‌’ అనే చెప్పాలి. #Beast అని ట్విటర్‌లో టైప్‌ చేయగానే పక్కన విజయ్‌ ఫేస్‌ వచ్చేది. ఇప్పుడు ‘సర్కారు వారి పాట’కు కూడా ఇలా పర్సనలైజ్డ్ ఎమోజీ తీసుకొచ్చారు. అందులోనూ ఒక హ్యాష్‌ట్యాగ్‌ కాదు, మూడు హ్యాష్‌ ట్యాగ్‌లు సిద్ధం చేశారు. వాటిని మహేష్‌ ఇటీవల ట్వీట్‌ చేసి ఫ్యాన్స్‌కి కిక్‌ ఇచ్చాడు.

ఇక ఈ సినిమా ప్రమోషన్స్‌ కోసం మహేష్‌బాబు రెడీ అయిపోయాడు. విదేశీ పర్యటన నుండి ఇటీవల హైదరాబాద్‌ చేరుకున్న మహేష్‌… ఏడో తేదీ ప్రి రిలీజ్‌ ఈవెంట్‌లో పాల్గొననున్నాడు. ఈ కార్యక్రమానికి ఎవరెవరు వస్తారు అతిథులు అనేది క్లారిటీ లేనప్పటికీ త్రివిక్రమ్‌, మహేష్‌బాబు, పూరి జగన్నాథ్‌ వస్తారు అని అయితే టాక్‌ వినిపిస్తోంది. విజయ్‌ దేవరకొండ కూడా వస్తాడు అంటున్నారు.